მცხეთაში დაკარგული 4 წლის ბავშვი ძაღლმა “ლექსამ” არ მიატოვა, – აღნიშნულის შესახებ სოციალური ქსელის ერთ-ერთი მომხმარებელი მანო კობახიძე პოსტს ავრცელებს:
“გიგის ფანებს მინდა შეგატყობინოთ, რომ ჩვენმა წითელკანიანთა ბელადმა გადაწყვიტა ახალი აუთვისებელი მიწების გამოკვლევა. თან ახლდა თურმე ჩვენი შეფარებული ძაღლი “ლექსა”. ხანგრძლივი ძებნის შემდეგ ჩავრთეთ სამაშველო. უღრმესი მადლობა მაშველებს. იქიდან ვერც თვითონ დაბრუნდებოდა და ვერც ჩვენ ვიპოვიდით. რომ არ გამიგრძელდეს სიტყვა, სახლშია და ყველაფერი კარგადაა, ცოტა ზომაზე მეტად დაკაწრულია… საგანგებო სიტუაციების მართვის სამსახურს და მცხეთის განყოფილებას უღრმესი მადლობა ოპერატიულობისთვის. ბედნიერება გვაჩუქეთ”, – წერს მანო კობახიძე.
ცნობისთვის, 4 წლის დაკარგული ბავშვი, მცხეთაში არხთან ცოცხალი იპოვეს.
როგორც ირკვევა, ბავშვი საცხოვრებელი სახლიდან დაახლოებით 1,5 კმ-ის მოშორებით, სარწყავი არხის მიმდებარედ იპოვეს.
“შინაგან საქმეთა სამინისტროს საგანგებო სიტუაციების მართვის სამსახურში მცხეთის მუნიციპალიტეტის სოფელ მისაქციელიდან შეტყობინება შემოვიდა, რომ დაკარგული იყო მცირეწლოვანი ბიჭი. ოჯახის წევრის განცხადებით, 4 წლის ბავშვი დაახლოებით 1 საათის წინ საცხოვრებელი სახლიდან გავიდა და ვეღარ პოულობდნენ.
მაშველები დასახმარებლად დაუყონებლივ გავიდნენ, და უმოკლეს პერიოდში საცხოვრებელი სახლიდან დაახლოებით 1,5 კმ-ის მოშორებით, სარწყავი არხის მიმდებარედ იპოვეს და უვნებლად დაუბრუნეს ოჯახს. პატარა ბიჭი თავს კარგად გრძნობს. მის სიცოცხლეს და ჯანმრთელობას საფრთხე არ ემუქრება”, – ნათქვამია საგანგებო სიტუაციების მართვის სამსახურის განცხადებაში.