თბილისის საქალაქო სასამართლოში, დღეს, გზის გადაკეტვისა და ე.წ. ტროტუარის საქმეებზე 6 პროცესი გაიმართება.
მოსამართლე დავით მაკარაძე ცოტა ხანში სამოქალაქო აქტივისტის, ანა მებურიშვილის საქმეს განიხილავს.
მას შინაგან საქმეთა სამინისტრო 7 თებერვალს, შაბათის მარშის დროს, გზის გადაკეტვას ედავება.
ადვოკატის თქმით, შსს-ს მიერ წარმოდგენილ ვიდეოში კანონსაწინააღმდეგო არაფერი ჩანს და უწყებას ამ საქმეზე არანაირი ხელშესახები მტკიცებულება არ გააჩნია.
“გავეცანი საქის მასალებს და საქმის მასალების მიხედვით ადმინისტრაციულ სამართალდარღვევათა ოქმი შედგენილია 7 თებერვალთან დაკავშირებით და შსს ამბობს, რომ ამ დღეს ანა მებურიშვილმა გადაკეტა ტრანსპორტის სავალი ნაწილი, თუმცა თქვენ იცით, რომ 7 თებერვალი იყო შაბათი დღე და ეს დღე არის მარშის დღე, მაშინ, როდესაც ძალიან ბევრი ადამიანი იკრიბება ფილარმონიასთან და ისინი მსვლელობით მიემართებიან პარლამენტთან. ცნობილია, რომ სათანადო წესით განცხადება 7 თებერვალთან დაკავშირებით შეტანილი იყო შსს-ში.
არანაირი ხელშესახები მტკიცებულება არ არსებობს, რომ კონკრეტული მოქალაქეები, მათ შორის ანა მებურიშვილი კეტავდა გზის სავალ ნაწილს,” – ამბობს უფლებადამცველი.