ნინო ლომჯარია ანტიკორუფციული ბიუროს ხელმძღვანელის რაჟდენ კუპრაშვილის ბრიფინგს ეხმიანება, სადაც მან განაცხადა, რომ არასწორია ინფორმაცია, თითქოს ბიურო არასამთავრობო ორგანიზაციებს მოქალაქეების პერსონალურ ინფორმაციას არამიზნობრივად სთხოვს.
“რაჟდენ კუპრაშვილმა ბრიფინგზე განაცხადა, რომ ბენეფიციარების შესახებ ინფორმაცია არ მოგვითხოვია, ტყუილია ეს და გადაამოწმეთო. ჰოდა, მედიებისთვის ვაზიარებ, ინებეთ სასამართლო გადაწყვეტილების ის ნაწილი, სადაც ჩვენი ბენეფიციარების პირად ნომრებს, ღონისძიებებში მონაწილე პირების ფოტოსურათებს ითხოვენ”- წერს ნინო ლომჯარია.
ცნობისთვის, იურისტი საბა ბრაჭველი სოციალურ ქსელში წერს, რომ ანტიკორუფციული ბიუროს უფროსი უფლებადამცველებისგან, სამართლებრივი საფუძვლების გარეშე, ითხოვს მათი დაცვის ქვეშ მყოფი მოქალაქეების და მათი ოჯახის წევრების პერსონალური ინფორმაციის გადაცემას.
ბრაჭველის თქმით, ბიურომ მოითხოვა ბენეფიციარების, დაცვის ქვეშ მყოფი ან სულაც შეხვედრებზე დამსწრე ადამიანების სიები, სახელები, გვარები, ფოტოსურათები, განსაკუთრებული კატეგორიის პერსონალური მონაცემები.
მოგვიანებით, ქართული ოცნების ანტიკორუფციული ბიუროს ხელმძღვანელის რაჟდენ კუპრაშვილის მტკიცებით, არასწორია ინფორმაცია, რომ ბიურო არასამთავრობო ორგანიზაციებს მოქალაქეების პერსონალურ ინფორმაციას არამიზნობრივად სთხოვს.