2026 წლის იანვარ-აგვისტოში საქართველომ რეკორდული რაოდენობის – 33 270 ტონა ხახვი შეიძინა, რომლის საიმპორტო ღირებულებამ 8.190 მლნ აშშ დოლარი შეადგინა.
შეგახსენებთ, რომ საქსტატის მონაცემებით, სექტემბერში ხახვი წლიურად ყველაზე მეტად გაძვირებულ პროდუქტებს შორის მეოთხე პოზიციას იკავებს – მისი ფასი 36.2%-ით არის გაზრდილი.
სტატისტიკის ეროვნული სამსახურის მონაცემებით, 2009 წლის შემდეგ (საგარეო ვაჭრობის პორტალზე მონაცემები ამ პერიოდიდან ქვეყნდება), მიმდინარე წლის იანვარ-აგვისტოში ხახვის იმპორტმა რაოდენობრივად მაქსიმუმს მიაღწია.
შედარებისთვის, გასული წლის იანვარ-აგვისტოში საქართველომ 30 789 ტონა ხახვი შეიძინა, რომლის ღირებულებამ 7.366 მლნ აშშ დოლარი შეადგინა. 2024 წლის ანალოგიურ პერიოდში იმპორტირებულია 25 969 ტონა, 6.686 მლნ აშშ დოლარის ღირებულების ხახვი, 2023 წლის რვა თვეში – 23 743 ტონა, 9.175 მლნ აშშ დოლარის ღირებულების პროდუქტი და ა.შ.
რაც შეეხება იმ ქვეყნებს, საიდანაც მიმდინარე წლის საანგარიშო პერიოდში საქართველოში ხახვი შემოვიდა, მათ შორის პირველ ადგილს აზერბაიჯანი იკავებს, რომელსაც სომხეთი და თურქეთი მოსდევს.
უფრო კონკრეტულად, „ბიზნესპრესნიუსი“ საქსტატის მონაცემებზე დაყრდნობით ხახვის იმპორტიორი ქვეყნების ხუთეულს გთავაზობთ:
აზერბაიჯანი – 25 231 ტონა (6.174 მლნ აშშ დოლარი);
სომხეთი – 3 391 ტონა (834.8 ათასი აშშ დოლარი);
თურქეთი -1 797 ტონა (434.8 ათასი აშშ დოლარი);
უზბეკეთი -1 303 ტონა (320 ათასი აშშ დოლარი);
ირანი – 432 ტონა (107.9 ათასი აშშ დოლარი).
რაც შეეხება საიმპორტო ფასს, მიმდინარე წლის იანვარ-აგვისტოში 1 კგ ხახვის საშუალო საიმპორტო ფასმა დაახლოებით 25 აშშ ცენტი შეადგინა, გასული წლის ანალოგიურ პერიოდში კი დაახლოებით 24 ცენტი იყო.
შენიშვნა: ფასი დაანგარიშებულია საერთო მაჩვენებლის მიხედვით და წარმოადგენს საშუალო ღირებულებას გადასახადების გარეშე.