“თსუ იურიდიული ფაკულტეტი” – სამწუხარო ინფორმაციას ავრცელებს. 73 წლის ასაკში, გარდაიცვალა ჰამბურგის მაქს პლანკის სახელობის საზღვარგარეთისა და საერთაშორისო კერძო სამართლის ინსტიტუტის ყოფილი დირექტორი, პროფესორი იურგენ ბაზედოვი.
“თსუ იურიდიული ფაკულტეტი ღრმა მწუხარებით იუწყება, რომ მოულოდნელად, 73 წლის ასაკში, გარდაიცვალა ჰამბურგის მაქს პლანკის სახელობის საზღვარგარეთისა და საერთაშორისო კერძო სამართლის ინსტიტუტის ყოფილი დირექტორი, პროფესორი იურგენ ბაზედოვი. პროფესორი ბაზედოვი ასწავლიდა გენუასა და ფერარას, ოქსფორდის, პიტსბურგის, როტერდამის ერაზმუსის, ნიუ იორკის, ბერლინის და ჰამბურგის უნივერსიტეტებში, იყო აუგსბურგის უნივერსიტეტის დეკანი. 2004-დან 2008-მდე იყო გერმანიის მონოპოლური საქმიანობის კომისიის თავმჯდომარე, 1997-დან 2017-მდე ჰამბურგის მაქს პლანკის საზღვარგარეთისა და საერთაშორისო კერძო სამართლის ინსტიტუტის დირექტორი. იგი იყო ოტო ჰანის მედალის მფლობელი, აქვს მინიჭებული მრავალი უნივერსიტეტის საპატიო დოქტორის ხარისხი.
პროფესორი ბაზედოვი იყო საქართველოს დიდი ქომაგი, თსუ-ის იურიდიული ფაკულტეტის ფასდაუდებელი პარტნიორი, უძვირფასესი კოლეგა და მეგობარი. 2012 წელს მას მიენიჭა თბილისის სახელმწიფო უნივერსიტეტის საპატიო დოქტორის წოდება [https://bit.ly/3nXDvjX]. პროფესორმა ბაზედოვმა მისი მოღვაწეობის აქტიურ ფაზაში დაგვტოვა, მით უფრო მძიმე და წარმოუდგენელია ჩვენთვის ეს დიდი დანაკარგი. ფაკულტეტის და ზოგადად ქართული იურისტების სახელით, ვისაც ჰქონდა შეხება დიდ მეცნიერთან და არჩვეულებრივ ადამიანთან იურგენ ბაზედოვთან, გამოვთქვამთ უღრმეს მწუხარებას მისი გარდაცვალების გამო და სამძიმარს ვუცხადებთ მის ოჯახს”