რუსი ოპოზიციონერი ბიზნესმენი მიხეილ ხადარკოვსკი რუსეთის ფინანსთა სამინისტროდან გაჟონილ დოკუმენტს აქვეყნებს, რომელშიც წერია, რომ რუსეთის მიერ უკრაინაში დაწყებულ ომს 48 759 რუსი ჯარისკაცი ემსხვერპლა.
ტექსტში ასევე ნათქვამია, რომ ომში დაღუპული სამხედროების ოჯახებისთვის კომპენსაციის სახით, რუსეთის მთავრობას აგვისტოს ბოლოს, 361 მილიარდ 400 მილიონი რუბლი ჰქონდა გადახდილი, რაც ნიშნავს რომ თითოეულმა ოჯახმა 7 მილიონ 400 ათასი რუბლი მიიღო.
საგულისხმოა, რომ გამოქვეყნებული დოკუმენტი თარიღდება 26.08.2022, ანუ ის არ შეიცავს მონაცემებს უკრაინის შეიარაღებული ძალების კონტრშეტევის შემდეგ.
უკრაინაში დაღუპული რუსი სამხედროების შესახებ ინფორმაციას უკრაინის გენშტაბი ავრცელებს. ყოველდღიური მონაცემებით ირკვევა რომ ომის მე-200 დღეს ლიკვიდირებულია 52 650 რუსი ოკუპანტი.
რაც შეეხება სხვა სამხედრო დანაკარგებს. უკრაინელებმა უკვე გაანადგურეს ოკუპანტების 2 154 ტანკი, 242 თვითმფრინავი, 213 ვერტმფრენი და 4 617 ბრონირებული ჯავშანტრანსპორტიორი.
ცნობისთვის, უკრაინელებმა იზიუმი, კუპიანსკი, ლიმანი, ბალაკლეა და კიდევ რამდენიმე ქალაქი და დასახლებული პუნქტი უკვე გაათავისუფლეს.
შეგახსენებთ, რომ ნაწილი რუსი დეპუტატებისა პუტინის თანამდებობიდან გადადგომას ითხოვს.
რუსეთმა უკრაინაში ფართომასშტაბიანი ომი 24 თებერვალს დაიწყო და ოკუპანტის აგრესია ამ დრომდე გრძელდება.