თბილისი-რუსთავის მაგისტრალის ფონიჭალის მონაკვეთის მშენებლობის გამო რამდენიმე მოქალაქეს უძრავ ქონებას იძულების წესით ჩამოართმევენ. ამის შესახებ ეკონომიკის სამინისტროს მიერ მიღებულ ბრძანებაშია აღნიშნული.
კერძოდ, როგორც ბრძანებაშია აღნიშნული, საერთაშორისო მნიშვნელობის თბილისი-წითელი ხიდის (აზერბაიჯანის რესპუბლიკის საზღვარი) საავტომობილო გზის თბილისი-რუსთავის მეორე {ფონიჭალის} მონაკვეთის (კმ 5+000-8+300) მშენებლობის პროექტი, წარმოადგენს ქვეყნის საგზაო ინფრასტრუქტურის გაუმჯობესების მიმართულებით დაგეგმილ ერთ-ერთ უმნიშვნელოვანეს ნაბიჯს.
დოკუმენტის თანახმად, თბილისი-რუსთავის საავტომობილო გზის მოწყობა აუმჯობესებს ქალაქ თბილისის კავშირს ქალაქ რუსთავთან. ერთმანეთთან აკავშირებს ქალაქის მიმდებარე უბნებს (ფონიჭალა, ლითონკონსტრუქციების დასახლება), რაც ზრდის მათი და ზოგადად ქალაქის სოციალური და ეკონომიკური განვითარების პერსპექტივას.
შეგახსენებთ, რომ პროექტი გულისხმობს 3,3 კმ სიგრძის მონაკვეთის მშენებლობას მდინარე მტკვრის გასწვრივ. არსებული ინფორმაციით, პროექტი გულისხმობს ოთხზოლიანი გზის მშენებლობას, რომლის საპროექტო სიჩქარეა 80 კმ/სთ იქნება. ამასთან, პროექტის ფარგლებში დაგეგმილია: 2 ორდონიანი კვანძის, 7 ხიდის და ნაპირსამაგრის მოწყობა.
როგორც ეკონომიკის სამინისტროს 2 ნოემბრის ბრძანებაშია აღნიშნული, თბილისი-რუსთავის მეორე {ფონიჭალის} მონაკვეთის მშენებლობის პროექტი აუცილებელი საზოგადოებრივი საჭიროების მქონე პროექტად ჩაითვალა.
შედეგად, იმ რამდენიმე პირის ქონება, რომელიც პროექტის ზემოქმედების არეალში ხვდება და ვისთანაც გამოსყიდვის თაობაზე შეთანხმება ვერ იქნა მიღწეული, ექსპროპრიაციას (იძულების წესით ჩამორთმევა) დაექვემდებარება.
უფრო კონკრეტულად, ბრძანების თანახმად, გზის ამ მონაკვეთის მშენებლობის გამო ექსპროპრიაციას ექვემდებარება:ვლადიმერ ჯოლოხავას საკუთრებაში არსებული, თბილისში ლითონკონსტრუქციის VI დასახლებაში, №127, ბ-3-ში (ვახტანგ შანავას ქუჩა №21) მდებარე 233 კვ.მ. ფართობის არასასოფლო-სამეურნეო დანიშნულების მიწის ნაკვეთი და მასზე მდებარე შენობა-ნაგებობა №1; ლეილა მოსულიშვილის საკუთრებაში არსებული, ვახტანგ შანავას №30-ში მდებარე 500 კვ.მ. ფართობის არასასოფლო-სამეურნეო დანიშნულების მიწის ნაკვეთი და მასზე მდებარე შენობა/ნაგებობები; ტარეკ შაფიკ სალეჰ ბოტროს და ამირ რამსეს ტავფიკ იუსუფის თანასაკუთრებაში არსებული, თბილისში, გარდაბნის გზატკეცილსა და მდინარე მტკვარს შორის (ნაკვეთი 154) მდებარე 380 კვ.მ. ფართობის არასასოფლო-სამეურნეო დანიშნულების მიწის ნაკვეთი; თამარ ზირაქიშვილის საკუთრებაში არსებული, თბილისში, გარდაბნის გზატკეცილსა და მდინარე მტკვარს შორის (ნაკვეთი №67) მდებარე 403 კვ.მ არასასოფლო-სამეურნეო დანიშნულების მიწის ნაკვეთი და მასზე მდებარე შენობა და ოთარ შაბურიშვილის საკუთრებაში არსებული, თბილისში, რუსთავის გზატკეცილზე №277-ში მდებარე 1637 კვ.მ არასასოფლო-სამეურნეო დანიშნულების მიწის ნაკვეთი და მასზე მდებარე შენობა/ნაგებობები.