აფხაზეთთან დაკავშირებით ნიკა გვარამიას მიერ გაკეთებული განცხადებები კვლავ შეფასების საგანია. “ანტიაფხაზური და შერიგების წინააღმდეგ მიზანმიმართული კამპანია” – ასე ეხმიანება მმართველი გუნდი “კოალიცია ცვლილებებისთვის” ერთ-ერთი ლიდერის მოსაზრებებს.
უმრავლესობაში გარე დავალების შესრულებაზეც აკეთებენ აქცენტს. პარლამენტის სპორტის კომიტეტის თავმჯდომარის მოადგილის, ზურაბ რურუას განცხადებით, კონკრეტული პოლიტიკოსების განცხადებები კონფლიქტისა და სიძულვილის ენის გაღვივებას ემსახურება მიზნად.
“ნიკა გვარამიას განცხადებები, მანამდე ბარამიძისა და მათი გუნდის სხვადასხვა წარმომადგენლის პათოსი ემსახურება არა ეროვნულობასა და შერიგების პოლიტიკას, არამედ კონფლიქტისა და სიძულვილის ენის დათესვას, რადგან ეს ადამიანები არიან მართულები”, – განაცხადა ზურაბ რურუამ.
შეგახსენებთ, ნიკა გვარამიამ თემაზე არაერთი განცხადება გააკეთა. სოციალურ ქსელში დაწერა, რომ “ტრავმული მეხსიერება განვითარებას ბლოკავს” – შექმნილი ვითარებიდან გამოსავლის კარგ მაგალითად კი ფაშინიანი მოიყვანა, რომელმაც ყარაბაღი დათმო. გვარამია ასევე ამბობს, რომ აფხაზები და ქართველები მტრები არიან და ამას სიყვარული ვერ შეცვლის.