კახეთში მოსული უხვი ნალექის შედეგად ადიდებულმა მდინარე თელავის ხევმა სამელიორაციო ინფრასტრუქტურა დააზიანა. სტიქიის შედეგად დაზიანდა მაწანწრის დიუკერი და თელავის ტერიტორიაზე გამავალი ზემო ალაზნის მაგისტრალური არხის რამდენიმე მონაკვეთი.
ამ დროისთვის ტარდება ინტენსიური აღდგენითი სამუშაოები, რომელთა მიმდინარეობას შპს „საქართველოს მელიორაციის“ გენერალური დირექტორი გიგლა თამაზაშვილი ადგილზე გაეცნო.
ამ ეტაპზე ზემო ალაზნის მაგისტრალური არხი წყალდიდობის შედეგად ჩატანილი ქვა-ღორღისა და დანალექი გრუნტისგან იწმინდება. ადგილზე მობილიზებულია შესაბამისი ტექნიკა, რათა უმოკლეს ვადაში აღდგეს სამელიორაციო ინფრასტრუქტურა და უზრუნველყოფილი იყოს სარწყავი სისტემის შეუფერხებელი ფუნქციონირება.
ინფორმაციას გარემოს დაცვისა და სოფლის მეურნეობის სამინისტროს პრესსამსახური ავრცელებს.