საპროცესო შეთანხმება, რა თქმა უნდა, ჩემი დაცვის ქვეშ მყოფის, ალექსანდრე გოგოლაძის სურვილით მოხდა, სხვა ვერ დააძალებდა, – ამის შესახებ ადვოკატმა გიორგი ჭოჭუამ ჟურნალისტებს მისი დაცვის ქვეშ მყოფის, ალექსანდრე გოგოლაძის სასამართლო სხდომიდან გათავისუფლების შემდეგ განუცხადა.
„ჩემი დაცვის ქვეშ მყოფისთვის მისაღები იყო პირობა, თუ დაუყოვნებლივ გათავისუფლდებოდა პატიმრობიდან. შესაბამისად, ამ შეთანხმებაზე პროკურატურა წამოვიდა და შედგა ჩვენ შორის შეთანხმება, რომელიც დღეს დაამტკიცა სასამართლომ და გათავისუფლდა სასამართლოს სხდომის დარბაზიდან.
საპროცესო შეთანხმება, რა თქმა უნდა, მისი სურვილით მოხდა, სხვა ვერ დააძალებდა. საპროცესო შეთანხმების პირობაა ასეთი, რომ უნდა იყოს შენი ნება გამოხატული და ამ შემთხვევაში ხდება საპროცესო შეთანხმების გაფორმება“, – განაცხადა გიორგი ჭოჭუამ.
ცნობისთვის, 4 ოქტომბერს, ათონელის სასახლესთან განვითარებულ მოვლენებთან დაკავშირებით ბრალდებულ 8 პირს – ევა შანშიაშვილს, ალექსანდრე გოგოლაძეს, გოჩა ყატაშვილს, სულხან აბრალავას, რამაზ ჯორბენაძეს, ჯანდრი თირქიას, გენადი კელიხაშვილს და დათო ღურწკაიას საპროცესო შეთანხმება გაუფორმდა.
ყველა მათგანი სასამართლოს სხდომათა დარბაზიდან გათავისუფლდა, გარდა ევა შანშიაშვილისა, ვინაიდან ის გირაოს სანაცვლოდ ისედაც თავისუფლებაში იმყოფებოდა. მხარეებს შორის მიღწეული საპროცესო შეთანხმება მოსამართლე ჯვებე ნაჭყებიამ დაამტკიცა.
რვავე პირს საპროცესო შეთანხმება 3 წლიანი პირობითი მსჯავრით გაფორმდა.
აღნიშნულ პირებს პროკურატურა საპროცესო შეთანხმებაზე მას შემდეგ დათანხმდა, რაც მათ ბრალი აღიარეს და მტკიცებულებები უდაო გახადეს.