თეატრი არის საჯარო სამართლის იურიდიული პირი, რომელიც დამოუკიდებლად წარმართავს თავისი საქმიანობას, საქართველოს კანონმდებლობით დადგენილი წესით, – ასე უპასუხეს “ტვ პირველს” კულტურის სამინისტროს პრესსამსახურში.
საუბარია 14 მაისს რუსთაველის თეატრის სცენაზე გამართულ წარმოდგენას, რომელიც რუსმა მსახიობებმა გამართეს.
უწყებაში ამბობენ, რომ რუსთაველის თეატრის ადმინისტრაციამ რუსეთის თეატრალური ხელოვნების ინსტიტუტის (ГИТИС) დამამთავრებელი კურსის სტუდენტებს მცირე სცენა იჯარით დაუთმო.
“ტვ პირველთან” სატელეფონო საუბარში თეატრის დირექტორი გია თევზაძე ამბობს, რომ სცენის დათმობის სანაცვლოდ, თეატრმა თანხა აიღო.
წინა კვირას თბილისში გამართული ღონისძიება მეორე მსოფლიო ომში გამარჯვების წლისთავს მიეძღვნა. შესრულდა რუსული სიმღერები, წაიკითხეს რუსი მწერლების და პოეტების ლექსები.