ეკლესიის მართვა-გამგეობის დებულებაში არსად წერია, რომ კანდიდატს უნდა ჰქონდეს დიპლომი – ამის შესახებ სოციალურ ქსელში კათალიკოს-პატრიარქის, ილია მეორის ფონდის ხელმძღვანელი, ლაშა ჟვანია წერს.
მისი განმარტებით, დებულების მიხედვით კანდიდატს “უნდა ჰქონდეს საღვთისმეტყველო განათლება და საეკლესიო მმართველობის საკმარისი გამოცდილება”.
ლაშა ჟვანიას თქმით, წმინდა სინოდი უფლებამოსილია დებულებაში შეიტანოს ცვლილება და ამას მისი განმარტებით, არ სჭირდება გაფართოებული კრება.
“თანამედროვეობის დიდი მოღვაწე და აღმშენებელი მიტროპოლიტი იობის საღვთისმეტყველო განათლების დადასტურებას ფიზიკურად დიპლომის არსებობა არ სჭირდება! მით უმეტეს, რომ ამას არ ითხოვს ეკლესიის მართვა-გამგეობის დებულება.
დებულებაში არსად წერია, რომ კანდიდატს უნდა ჰქონდეს (ან უნდა წარმოადგინოს) დიპლომი. დებულების მიხედვით კანდიდატს “უნდა ჰქონდეს საღვთისმეტყველო განათლება და საეკლესიო მმართველობის საკმარისი გამოცდილება”.
ანალოგიური ვრცელდებდა საქართველოს ეკლესიის მნათობ ღვაწლმოსილ და მისაბაძ მღვდელმთავრებზე – წმინდა სინოდის წევრთაგან “სტარეც”-ად აღიარებულ მიტროპოლიტ დანიელზე და ქვეყნისა და ხალხისთვის თავდადებულ მიტროპოლიტ ისაიაზე.
ასევე, “დებულების” მე-7-ე თავის მე-4-ე მუხლის შესაბამისად, სამღვდელმთავრო კანდიდატსაც “უნდა ჰქონდეს შესაფერისი საღვთისმეტყველო და საერო განათლება”. ანუ ერთი მხრივ მღვდელმთავრობაში კრიტერიუმი დაკმაყოფილებულია, ხოლო კანდიდატობის პირობებში დიპლომის ქაღალდის არქონა კრიტერიუმის დარღვევად ჩაითვალა.
წმინდა სინოდი უფლებამოსილია დებულებაში შეიტანოს ცვლილება (არ სჭირდება გაფართოებული კრება) (დებულება; თავი 15; მუხლი 3). შესაბამისად, არასწორია ის აზრი, რომ ცვლილება შესაძლებელია მხოლოდ პატრიარქის არჩევის შემდეგ.
ეკლესიის საჭეთმპყრობლის არჩევის პროცესი ზედმიწევნით სწორი გზით უნდა წარიმართოს. “და ნუ შეაწუხებთ სულსა წმიდასა ღმრთისასა, რომლითაცა-იგი აღიბეჭდენით დღედ გამოჴსნისა”, რათა არ აღმოჩნდეს, რომ “ურჩ ექმნნეს და განაძჳნეს სული წმიდაჲ მისი, და გარდაექცა მათ უფალი მტერად და იგი ებრძოლა მათ.”- წერს ლაშა ჟვანია.
ცნობისთვის, გუშინ წმინდა სინოდის წევრმა, მარნეულისა და ჰუჯაბის ეპისკოპოსმა, გიორგი ჯამდელიანმა “ტვ პირველის” ეთერში განაცხადა, რომ პატრიარქობის კანდიდატის, მეუფე იობის დიპლომი გაუჩინარებულია. მან გამოთქვა ეჭვი, რომ მეუფე იობს დიპლომი მოჰპარეს.