მუნიციპალური განვითარების ფონდმა, აბასთუმანში, ინფრასტრუქტურის რეაბილიტაციისათვის 70 მლნ ლარის ღირებულების ხელშეკრულება შპს “საბა კონსტრაქშენთან” გააფორმა, რომელიც ტენდერში მონაწილე ერთადერთი კომპანია იყო – ინფორმაციას BMG ავრცელებს.
პროექტის ფარგლებში დაგეგმილია ისტორიული და კულტურული მნიშვნელობის მქონე შენობა-ნაგებობების აღდგენა, საზოგადოებრივი დანიშნულების ტურისტული და რეკრეაციული ობიექტების კეთილმოწყობა, ქუჩებისა და გზების განახლება და ნაპირსამაგრი ნაგებობებისა და სახიდე გადასასვლელების მშენებლობა-რეკონსტრუქცია.
შესრულებული სამუშაოების სრული საგარანტიო ვადა ორი წელია.
გამოცემა წერს, რომ აბასთუმნის რეაბილიტაციისთვის და მის გარშემო საგზაო ინფრასტრუქტურის გამართვისთვის გასული წლების განმავლობაში სახელმწიფო ბიუჯეტიდან უკვე 280 მილიონ ლარზე მეტი დაიხარჯა. ამასთან, კურორტი განახლებული სახით ჯერ არ გახსნილა, ასევე არ გახსნილა ადგილზე მშენებარე რამდენიმე მაღალი კლასის სასტუმრო.