აფგან სადიგოვმა საერთაშორისო პასპორტი მიიღო – ამის შესახებ აზერბაიჯანელი ჟურნალისტის მეუღლე, სევინჩ სადიგოვა სოციალურ ქსელში წერს და ფოტოსაც აქვეყნებს.
მისივე თქმით, ეს არ ნიშნავს, რომ „სისტემაში მასზე ძებნა გამოცხადებული არ არის“.
ჟურნალისტის ცოლი ასევე ამბობს, რომ მათი შემდგომი მიზანია, აფგანმა აზერბაიჯანი დატოვოს.
“აფგან სადიგოვმა საზღვარგარეთ გასამგზავრებელი პასპორტი მიიღო. თუმცა ეს სულაც არ ნიშნავს, რომ მის შესახებ სისტემაში არსებული ძებნა მოხსნილია. რადგან სერვისების განვითარების სააგენტოს თანამშრომლებმაც არაერთხელ გაუსვეს ხაზი, რომ პრობლემა კვლავაც არსებობს.
ახლა ჩვენს წინაშე მდგომი შემდეგი მიზანი, სამწუხაროდ უნდა აღვნიშნო, ქვეყნის დატოვებაა. რატომ ვამბობ ამას სინანულით? იმიტომ, რომ სამშობლოს დატოვება ადამიანისთვის თითქოს ყველაფრის დაკარგვას ნიშნავს. მაგრამ სხვა გზაც აღარ გვაქვს”, – წერს სადიგოვის ცოლი.