ფიზიკურად თუ გინდათ რომ გადავრჩე და საქმის ბოლომდე აღსრულება ერთად აღვნიშნოთ უნდა გამიგოთ, ცოტა ხანს სიტყვასაც ვერ ვიტყვი, – ამის შესახებ თბილისში მოკლული ნიკო კვარაცხელიას დედა სოციალურ ქსელში წერს.
იზა ომაძის თქმით, დღეს ყველა ტკივილი განუახლდა და ამდენი საშინელი ინფორმაციის გაძლება უჭირს.
“მე ხომ მომკლეს.” დიდი ამბავი!
აი მეც დამხვრიტეს, მაგრამ მაინც ცოცხალი ვარ, ვარ თუ არა ცოცხალი? როგორ გგონია.
დამმარხეს და მაინც მიწაზე დავდივარ. იცი რატომ? იმიტომ რომ ვერ დამაჯერეს ჩემი მოკვლის უფლება რომ ჰქონდათ. მთავარი კი ესაა.”( ოთარ ჭილაძე)
დღეს ჩემი ოჯახისთვის, მეგობრებისთვის, ახლობლებისთვის 15 სექტემბერია. დიახ დღეს ყველა ტკივილი განმიახლდა, ვერ ვუძლებ ამდენ საშინელ ინფორმაციას!!!
ყველას უკლებლივ გიხდით მადლობას, განსაკუთრებით ჟურნალისტებს და ფიზიკურად თუ გინდათ რომ გადავრჩე და საქმის ბოლომდე აღსრულება ერთად აღვნიშნოთ უნდა გამიგოთ, ცოტა ხანს სიტყვასაც ვერ ვიტყვი.
ასე ზემოდან მადლიერი სახით დაგვყურებს, ჩემი ჩვენი და ყველას ნიკო!!!- წერს ომაძე.
პროკურატურის ინფორმაციით, ნიკო კვარაცხელიას მკვლელობა გახსნა – მკვლელობის დამკვეთად ყოფილი პრემიერი-მინისტრის, ზურაბ ჟვანიას შვილი ბუსა ჟვანია და ძმები – დავით და გურამ კაკულიები დასახელდნენ.
როგორც პროკურატურაში გამართულ ბრიფინგზე პროკურორმა გიორგი მიქაიამ განაცხადა, ნიკო კვარაცხელიას მკვლელობა სწორედ ზურაბ ჟვანიას შვილის, ბუსა ჟვანიას სახლში იგეგმებოდა.
საქმის მასალების მიხედვით, ბესარიონ ჟვანია მის ნაცნობებს ალეკო ჭელიძეს და გიორგი კავილაძეს დაუკავშირდა, შესთავაზა მათ ძმები კაკულიების შეკვეთით მოეხდინათ ნიკოლოზ კვარაცხელიას ჯგუფური მკვლელობა, რაზედაც ისინი დათანხმდნენ.