პატიმარ დავითაძის ოჯახს არ სჯერათ პროკურატურის ვერსიის, რომ ამდენი თვე იკვლიეს და რეზონანსულ საქმეში საეჭვო ვერაფერი აღმოაჩინეს.
დავითაძეები ამბობენ, რომ გამოძიების მოულოდნელად დასრულება ირაკლი კობახიძის კარნახითა და ზეწოლით მოხდა, რადგან სწორედ მთავრობის მეთაურმა თქვა რამდენიმე დღის წინ, რომ ყველაფერი სწრაფად უნდა გარკვეულიყო და გამოძიება მალე უნდ დასრულებულიყო.
კობახიძემ გადაწყვიტა და მოუწოდა თავიანთ გამოძიებას, ზეწოლა მოახდინა მათზე, რომ დაესრულებინათ გამოძიება. ე.ი. კობახიძის ნებაზეა, ესა თუ ის გამოძიება როდის დასრულდება ან რა მეთოდით დასრულდება. რა თქმა უნდა, დასრულდა ისე, როგორც სურდა კობახძეს და მის მმართველ გუნდს, ვინაიდან და რადგანაც იცოდნენ, რომ თუ დასრულდებოდა ეს საქმე ისე, როგორც აღწერილია იმ კადრებში, მაშინ მათ ეს ქვეყანა თავზე დაემხობოდათ”, – აცხადებს ირმა დავითაძე.
“ის რაც მდინარაძემ დაიწყო, დაასრულა კობახიძემ” – ეუბნება “ტვ პირველს” გიორგი დავითაძის მამა ავთო დავითაძე.
“საერთოდ ეს პროცესი, რაც დაწყებულია ჩემი ოჯახის წინააღმდეგ, არის პოლიტიკური დაკვეთა. როგორ შეიძლება მდინარაძეს დაეწყო ეს პროცესი და კობახიძეს სხვანაირად დაემთავრებინა. დაკვეთა იყო მდინარაძის, დასკვნა დადო კობახიძემ. მე სხვა არც ველოდებოდი. კაცი გამოდის, ქვეყნის პრემიერ-მინისტრი, 10 თვის განმავლობაში არ მთავრდება გამოძიება და 2 დღეში მოუწოდა, რომ სასწრაფოდ დაასრულეთო. დაასრულეს, ის მათ რაც აწყობდათ. რომელ სამართალზეა აქ საუბარი, რომელ მორალზეა აქ საუბარი. ასე მალავენ, ჩქმალავენ და ხელს აფარებენ დამნაშავე პოლიციელებს და დამნაშავე ჯალათ ბადრაგებს თავისი ციხის უფროსის, შოთა ტრაპაიძის თამადობით. ეს კარგს არც მათ მოუტანთ და არც ჩვენს ქვეყანას”, – ამბობს ავთანდილ დავითაძე.
საქართველოს პროკურატურამ რუსთავის N6 საპატიმრო დაწესებულებაში მოთავსებული მსჯავრდებულის, გიორგი დავითაძის მიმართ განხორციელებული შესაძლო სექსუალური ძალადობის ფაქტზე მიმდინარე გამოძიება დაასრულა. ამის შესახებ ინფორმაციას პროკურატურა ავრცელებს.
უწყების მტკიცებით, მოპოვებული მტკიცებულებები ცხადყოფს, რომ დაწესებულების დეესკალაციის ოთახში გიორგი დავითაძის შემოწმების პროცესში, მის მიმართ რაიმე სახის ძალადობას და დანაშაულებრივ ქმედებას ადგილი არ ჰქონია. შესაბამისად, მიღებულია გადაწყვეტილება სისხლის სამართლის საქმეზე გამოძიების შეწყვეტის შესახებ.