საწვავზე ფასის შემცირება, სავარაუდოდ, არ იგეგმება. მთავრობამ ნავთობიმპორტიორ კომპანიებთან შეხვედრები გამართა, თუმცა შედეგი არ მოჰყოლია. ამას ადასტურებს ქვეყნის ერთ-ერთი უმსხვილესი ნავთობიმპორტიორის, „ვისოლ ჯგუფის“ ხელმძღვანელის, სოსო ფხაკაძის განცხადებებიც. კომპანია აერთიანებს როგორც ბენზინგასამართ სადგურებს, ასევე „სმარტის“ ქსელურ მარკეტებს. ფხაკაძის თქმით, საწვავზე არსებული მაღალი ფასები ბუნებრივ ეკონომიკურ მოცემულობას წარმოადგენს.
ირაკლი კობახიძე მაღალ ფასებზე საუბრისას ერთ-ერთ მთავარ ფაქტორად ქსელური მარკეტების მიერ დაწესებულ ე.წ. ქეშბექის სისტემას ასახელებს. მისი ინფორმაციით, აღნიშნული გადასახადი 15 წლის წინ დაახლოებით 4 პროცენტი იყო, დღეს კი 50 პროცენტამდეა გაზრდილი.
ე.წ. ქეშბექის გადასახადს ქსელური მაღაზიები აწესებენ, რომლის გადახდაც დისტრიბუტორებსა და მწარმოებლებს უწევთ. მაგალითად, იმისთვის, რომ კონკრეტული პროდუქტი, მათ შორის ყავა მაღაზიის დახლებზე მოხვდეს, იმპორტიორი ან მწარმოებელი დამატებით თანხას იხდის. ეს არ არის გაყიდული პროდუქციის პროცენტი, რომელიც მარკეტს რჩება, არამედ ცალკე გადასახადი, რაც საბოლოოდ პროდუქციის ფასზე აისახება.