“რას იქადაგებ ამბიონიდან ეს არის შენი გადასწყვეტი” – მეუფე იაკობი გიორგი ვოლსკის პასუხობს, რომელმაც კრიტიკული ქადაგების შემდეგ თქვა, რომ “მეუფე იაკობი პოლიტიკურ განცხადებებს არ უნდა აკეთებდეს”.
ბოდბელმა მიტროპოლიტი ამბობს, რომ ეკლესიის მოვალეობაა ბალანსი დაიცვას და არ მოხდეს კონკრეტული ადამინების დაჩაგვრა.
“არის ხოლმე, როცა ჩვენი ქადაგება ძალიან მოსწონთ, ზოგჯერ შეიძლება პატარა რაღაც არ მოეწონოთ, მაგრამ ჩვენ ვართ რისთვის, რომ ბალანსი დაცული იყოს, არავინ დაიჩაგროს და ერი განვითარდეს. ეს სახელმწიფოს და მთავრობას არ შეუძლია, ეკლესიის საქმეებში ჩარევა და რას იქადაგებ ამბიონიდან ეს არის შენი გადასაწყვეტი. ეს უნდა ეხებოდეს უშუალოდ ქრისტიანობას და რევოლუციისკენ არ უნდა მოუწოდებდე რა თქმა უნდა. ჯვარი გვწერია”- თქვა სასულიერო პირმა.
მაღალი იერარქი ამბობს, რომ “ეკლესია იდგება იქ, სადაც ქართველი ხალხი დგას”.
“საქართველო ყველას ქვეყანაა, ვეცადოთ, რომ განვითარდეთ და ერთმანეთს გული არ ვატკინოთ. ცხოვრება გავულამაზოთ, დავეხმაროთ ერთმანეთს. რამდენი წელი უნდა იცხოვრო, რომ ეს დრო ერთმანეთის ლანძღვასა და დაჭმაში გავატაროთ. გავიხსენოთ, რომ შენს მოწინააღმდეგეს შვილ ან შვილები, დედ-მამა, ოჯახი ჰყავთ. ეს ქართველებს უნდა გვახსოვდეს!”- განმარტა ქადაგებისას მეუფე იაკობმა ბოდბის წმინდა ნინოს დედათა მონასტერში ქადაგებისას.
შეგახსენებთ, წინა კვირას, მეუფე იაკობმა “ქართული ოცნების” ხელისუფლებას მოქმედებისკენ მოუწოდა და უთხრა, რომ დიდი შერიგება ეკლესიის შუამავლობით უნდა მოხდეს. მისივე თქმით, ხელისუფლებამ ეკლესიასთან ერთად უნდა დაუძახოს ოპოზიციასაც და აქციებში მონაწილე საზოგადოებასაც.
წმინდა სინოდის წევრის ქადაგებას “ქართული ოცნების” ლიდერმა, გია ვოლსკიმ უპასუხა და თქვა, რომ სასულიერო პირები პოლიტიკურ განცხადებებს არ უნდა აკეთებდნენ.