მსახიობი ბესო ზანგური Ambebi.ge -სთვის მიცემულ ინტერვიუში აცხადებს, რომ იმ სამსახურების პოვნაში, სადაც დამატებით უმუშავია, რობერტ სტურუა არასდროს ჩარეულა და დასძენს, რომ რეჟისორს არ უყვარს, როდესაც მსახიობები დამატებით სხვაგანაც მუშაობენ. როგორც ზანგური Ambebi.ge-სთან საუბრისას ამბობს, “მასზე ბულინგი შვილებსა და ოჯახზე ძალიან მოქმედებს.”
“რობერტ სტურუა და კახა კალაძე არაფერ შუაში არ არიან. ვინაიდან, მრავალშვილიანი მამა ვარ, ჩემთვის თავისუფალ დროს სადაც ვნახულობ ვაკანსიას, ყველგან ვცდილობ, მივიდე და დროებით ვიმუშავო. 2012 წელს ასე “დელტაშიც“ ვმუშაობდი, შემდეგ ანსამბლიც ჩამოვაყალიბეთ შინაგან საქმეთა სამინისტროს ბაზაზე. ძალიან ბევრ ადგილას მიმუშავია და საერთოდ, შრომა არ მეთაკილება. რით არ მობეზრდათ ჩემი ბულინგი?! ამ ყველაფერს ბავშვები ხედავენ და ერთადერთი, რაც ჩემზე მოქმედებს, ეს არის”, – ამბობს ზანგური “Ambebi.ge” – სთან ინტერვიუში.
ამასთან, მსახიობი ადასტურებს, რომ სასაფლაოების ამზომველის პოზიციაზე ნამდვილად მუშაობდა.
“ვაკანსია ვნახე და დავრეკე, მითხრეს, რომ გასაუბრებაზე მივსულიყავი. გასაუბრების შემდეგ დამიკავშირდნენ და დავიწყე მუშაობა, საკმაოდ დაბალ ხელფასზე, მაგრამ სხვა გზა არ მქონდა, ვმუშაობდი, როცა გამომიძახებდნენ ხოლმე. ვაკეთებდი იმას, რაც მევალებოდა. როგორც გითხარით, თავდაცვის სამინისტროშიც ვმუშაობდი, “ნაციონალური მოძრაობის“ წასვლის შემდეგ ყველაფერი დაშლილი იყო და ამ ყველაფერს დაწყობა და დალაგება უნდოდა. მაშინ რამდენიმე ტანკი “გარაჟებშიც” კი იპოვნეს.
შემდეგ ჩამოვაყალიბეთ ანსამბლი “თარიკონი“ შინაგან საქმეთა სამინისტროს ბაზაზე, სადაც თანამშრომლების შვილებს უფასოდ ვასწავლიდით მხატვრულ კითხვას, ცეკვას. ამ ბავშვებმა ბათუმში ფესტივალზე გრან-პრიც კი აიღეს. ჩემი საქმე რომ მორჩა, აქედანაც წამოვედი. ბავშვებიც მომიმზადებია მეტყველებაში, არ მეთაკილება არანაირი სამუშაო.
როდესაც რუსთაველის თეატრში დაკავებული ვარ როლებზე, მაშინ არსად არ ვმუშაობ. ორი წელია პანდემიაა და რატომ უნდა ვმჯდარიყავი სახლში და ფული სხვისთვის გამომერთმია?!”, – ამბობს ზანგური “Ambebi.ge” – სთან საუბრისას.
მან დედის ჯანმრთელობის მდგომარეობის შესახებაც ისაუბრა და აღნიშნა, რომ ცუდად არის. მისი თქმით, დედას სიარული არ შეუძლია. მსახიობი დასძენს, რომ ქირით ცხოვრობს.
წყარო:- ambebi.ge
ავტორი: – ნინო გიგიშვილი
https://mix.metronome.ge/25531-2/