საზოგადოებრივ-ლიტერატურული ჟურნალი არილი, რომელსაც გასულ წელს კულტურის სამინისტრომ დაფინანსება შეუწყვიტა, დონორების მხარდაჭერით სარგებლობასაც ვერ ახერხებს. არილის რედაქტორის, ლექსო დორეულის თქმით, ნორვეგიულ ფონდს სურს დააფინანსოს არილის ნომერი, რომელიც მთლიანად მიეძღვნება ნორვეგიულ ლიტერატურას, მაგრამ ისინი ამ შესაძლებლობით ვერ ისარგებლებენ.
“ახლა მოგვწერეს, რომ ნორვეგიულ ფონდს სურს დააფინანსოს არილის ნომერი, რომელიც მთლიანად მიეძღვნება ნორვეგიულ ლიტერატურას. დიდი ხნის ოცნება იყო ჩემი და მახოსი ეს. ნორვეგიული და ირლანდიური ნომრები. მაგრამ რა ვქნათ? გვიწევს უარი ვთქვათ ამ შესაძლებლობაზე, თორემ ეგრევე აგენტების იარლიყებს მოგვაკრავს ქართული ოცნება” – წერს დორეული სოციალურ ქსელში.
“არილის” ნომრები, წლების განმავლობაში, სხვადასხვა საელჩოსთან თუ ფონდებთან თანამშრომლობით მომზადებულა და თემატურად, იმ ქვეყნების ლიტერატურას ეთმობოდა.
“როგორც იცით, არილის ბევრი მნიშვნელოვანი თემატური ნომერი მოგვიმზადებია საელჩოებთან და ფონდებთან თანამშრომლობის ფორმატში: იტალიური ნომერი, ფრანგული, ბერძნული, სომხური… მართლაც შესანიშნავი და მრავალი აზრით მნიშვნელოვანი ნომრები იყო, ბევრი ჩვენი მკითხველი დამეთანხმება. მას შემდეგ, რაც სამინისტრომ დაფინანსება შეგვიწყვიტა, კიდევ უფრო გავაქტიურდით ამ მიმართულებით, რომ ჩვენი მკითხველებისთვის, რომლებიც არილს დონაციებით აცოცხლებენ, დროდადრო ამოსუნთქვის შესაძლებლობა მიგვეცა”
ამჟამად, ჟურნალის რედაქცია ახალ ნომერზე მუშაობს, რომელიც მთლიანად მიეძღვნება მალხაზ ხარბედიას.