ვიცე-პრემიერმა, კულტურის, სპორტისა და ახალგაზრდობის მინისტრმა თეა წულუკიანმა „რუსთავი 2“-ის ეთერში, ოპოზიციის საწინააღმდეგო ბანერებზე ისაუბრა. წულუკიანმა ჟურნალისტის დასმულ კითხვას – მოსწონს თუ არა ეს ბანერი, ჟურნალისტის მხრიდან კეკლუცობა უწოდა და აღნიშნა, რომ ამაში საძრახისს ვერაფერს ხედავს და ეს ბანერები ემსახურება არა სიძულვილის გაღრმავებას, არამედ წარსულის მეხსიერებას.
„ძალიანაც კარგია, რომ ეს ბანერები არის, მასში განსაკუთრებული არაფერია. დავრწმუნდი და მნიშვნელოვანია, რომ ეს არ არის „ქართული ოცნების“ გაკეთებული. ესენი არ უნდა დაგვავიწყდეს. რა არის ამ ბანერზე? – უხამსობა, პორნოგრაფია, თუ რა ხდება ამ ბანერზე ამისთანა? – ყველას ჰყავს შვილი, ერთმანეთის შვილები თუ უნდა დავიცვათ, უნდა მოვიქცეთ წესიერად. ეს ადამიანები საკუთარ თავს ვერ გაექცევიან და ვერც მათი შვილები ვერ გაექცევიან ამ წარსულს, ამიტომ ნუ ვიკეკლუცებთ“, – განაცხადა თეა წულუკიანმა.
ვიცე-პრემიერის აღნიშნულ განცხადებას ჟურნალისტი თამარ ჩერგოლეიშვილი “ფეისბუქის” პირად გვერდზე ეხმაურება:
“ჩვენი შვილებიც ეზიზღება ამას. ჩემი შვილი 2002 წლიდან ვიცი, რომ ეზიზღება.
ოთხშაბათობით საფრანგეთში საბავშვო ბაღები არ მუშაობს და კატო 1 საათით (სანამ ჩოგბურთზე ჩავიყვანდი) სამსახურში მიმყავდა.
ერთ დღეს ჩემი გაოგნებული უფროსი დამადგა დ ეს ქალი ნორმალური თუაო, რატომ ეზიზღები ასეო. მეთქი რა ხდება – მომწერა რომ სამუშაო დროს ბავშვი გყავს სამსახურშიო, და მაწუხებსო. ჩემს უფროსს თავად ჰყავდა 5 შვილი და თავად დაყავდა სამსახურში. მაგრამ აი, ასეთი უტვინო ბოღმა იყო იმთავიდან. მე მაინც მეცოდებოდა, არ ვიცი რატომ – მეგონა რომ ძალიან იტანჯება ამ სიძულვილში,” – წერს ჩერგოლეიშვილი სოციალურ ქსელში.