ათასწლეულების წინ, ონს ეგვიპტესთან ჰქონდა პირდაპირი ვაჭრობა – ამის შესახებ საქართველოს პარლამენტის თავმჯდომარემ, კახა კუჭავამ „ქართული ოცნების“ ონის მერობის კანდიდატის, სერგო ხიდეშელის წარდგენისას განაცხადა.
პარლამენტის თავმჯდომარის ნათქვამს, “მთავარი არხის” გენერალური დირექტორი ნიკა გვარამია “ფეისბუქის” პირად გვერდზე შემდეგნაირი პოსტით ეხმაურება: – “უფალო, ყველაზე მოკლე გზა მითხარი, როგორ მოგაგნო,” – დაწერა გვარამიამ.
კახა კუჭავა დარწმუნებულია, რომ რაჭა ვიზიტორებით ნამდვილად გამორჩეული იქნება.
„საათობით შემიძლია, ვისაუბრო ზემო რაჭაზე, ონის მუნიციპალიტეტზე, იმ სილამაზეზე, რომელიც ფეხით რამდენჯერმე მაქვს მოვლილი. თუმცა, ერთ მნიშვნელოვან ფაქტს და საკითხს აუცილებლად ვახსენებ.
ერთ-ერთი უძველესი ბრილის ცივილიზაცია სწორედ აქედან მოდის. ზოფხითურას და რიონის შესართავთან ნაპოვნია წარმოუდგენელი არტეფაქტები, რომელიც ადასტურებს, რომ ძველ წელთაღრიცხვამდე ათასწლეულების წინ, ეგვიპტესთან იყო პირდაპირი ვაჭრობა. მხოლოდ აქ და ეგვიპტეშია ნაპოვნი ისეთი შენადნობები, რომელსაც სხვაგან ანალოგი არ აქვს, რაც ადასტურებს, თუ რამდენად დიდი და ძლიერი იყო ეს კუთხე და რამდენად დიდი მნიშვნელობა ჰქონდა, მათ შორის, ვაჭრობაში ამ ულამაზეს რეგიონს.
არ შეიძლება ადამიანს ერთხელ მაინც არ ჰქონდეს ნანახი ულამაზესი გონას ხეობა, ხეობა, რომელზეც ლეგენდები დადის და რაც არ უნდა ბევრი მოისმინო, ერთხელ ნახვა ნამდვილად სჯობს – ეს წარმოუდგენელი სილამაზეა. აუცილებლად უნდა ნახო უძირო ტბა და თუ საშუალება გვაქვს, არ შეიძლება ერთხელ მაინც არ შეავლო თვალი. სოფლები და ხალხი, რომელიც გამოირჩევა განსაკუთრებული სითბოთი და სტუმართმოყვარეობით.
ულამაზესი ღები-სოფელი, რომელიც საუკუნეების წინ რამდენიმე სვანური კოშკითაც იყო წარმოდგენილი. დღესაც არის შემორჩენილი ქვის სახლები, რასაც სწორი დაგეგმარება და რეკონსტრუქცია სჭირდება და იგი ერთ-ერთი უმნიშვნელოვანესი ტურისტული მიმართულება გახდება. დღესაც ბევრი სტუმრობს, რადგან ღებიდან გზები ზუსტად რიონის საწყისებთან და გონას ხეობაში ადის. თუმცა აუცილებელია, დასრულდეს ის გზა, რომლის მშენებლობაც დაწყებულია, დიდი სამუშაოები უკვე ჩატარებულია და მომავალ წელს, დასრულდება. აუცილებელია ასეთი სოფლების პოტენციალის სრულად გამოყენება.
ულამაზესი შოვი – კოტეჯები მდინარის პირას, სადაც სამოთხეა. ონი არის ულამაზესი და ისტორიული თავისი დანიშნულებით. ერთ-ერთი ულამაზესი ქალაქი, რომელიც გამოირჩეოდა ხელნაკეთებით და ხელოსნობით. დღესაც შემორჩენილია“, – აღნიშნა კახა კუჭავამ „ქართული ოცნების“ ონის მერობის კანდიდატის წარდგენისას.