“დიდი ცირკი” ასე უწოდა საქართველოს მეხუთე პრეზიდენტმა “ქართული ოცნების” პოლიტსაჭოს და უმრავლესობის სხდომებს, რომელიც ბიძინა ივანიშვილის მონაწილეობით გაიმართა.
სალომე ზურაბიშვილის თქმით, ” ქართული ოცნება” ხვდება, რომ ბოლო დაჭერებმა ის დააზიანა და მხარდამჭერებს კარგავს, შესაბამისად საჭირო გახდა მოქმედება:
“თუ წუხს ივანიშვილი, რატომ ჩასვა [ყოფილი თანაგუნდელები] ციხეში? ხომ ცხადია, რომ ეს მისი თანხმობის გარეშე არ მომხდარა. ეს ყველაფერი სწორედ იმავიშვილის ხელდასმით და მისი გადაწყვეტილებით მოხდა, ნაკლებად მჯერა, რომ უცებ გული აუჩუყდა.
“ქართული ოცნება”, რომ ამ პროცესმა დააზიანა [ფაქტია] თავისი მხარდამჭერებიც მიხვდნენ, რომ ეს არის რეჟიმი, რომელიც გაურკვეველი მიმართულებით მიდის. რეჟიმი რომ დასასრულისკენ მიდის, ესეც ძალიან კარგად ჩანს. მათი მხარდამჭერებისთვისაც გაურკვეველია, რატომ არის ყველა ციხეში – რატომ იყო ყველა კორუფციაში გარეული. “ქართული ოცნებისთვის” ეს პრობლემაა, კარგავს მხარდამჭერებს, ეს მათ იციან, რადგან თავისივე კვლევები ამას აჩვენებს. ამიტომ ცდილობენ, რაღაც გაუგებარ მოძრაობებს, რომ ვიღაცას რაღაც დააჯერონ.
და საერთოდ, რა დანიშნულება ჰქონდა დღევანდელ ყრილობას, ხომ ვერ მეტყვით? არ მიმაჩნია, რომ საინტერესო იყოს, მათი შიდა შურისძიება, გადაბრალება, ერთის გამოშვება, მეორეს დაჭერა. ეს არის ერთი დიდი ცირკი, რომ ამას მივაქციოთ ყურადღება და არა იმას, რომ ქვეყანა არის დაკარგვის პირას და აქ რუსეთი შემოდის ყველა მხრიდან” – განაცხადა ზურაბიშვილმა.