“ძალიან მტკივნეული ამბავია… რამეს არასწორად ვაკეთებთ?” – გოგა ჩანადირი

ფოტოხელოვანი გოგა ჩანადირი “ფეისბუქის” პირად გვერდზე ქვეყანაში შექმნილ მძიმე ეპიდემიოლოგიურ ვითარებას ეხმაურება და წერს:

“ჩვენთან ბოლო დროს ძალიან, ძალიან მაღალია კოვიდ 19-ით გარდაცვალების რიცხვი და ამ მხრივ მსოფლიოში მოწინავე ვართ.
უამრავ ადამიანს ვკარგავთ ყოველდღიურად.
მხოლოდ აგვისტოში 2000-ზე მეტი ადამიანი გარდაიცვალა.
გესმით, რა უმძიმესი სტატისტიკაა?
კატასტროფაა ამ პატარა ერისთვის.
რამეს არასწორად ვაკეთებთ?
სამედიცინო რესურსი და კვალიფიკაცია არ გვყოფნის?
არადა, ახლა უფრო მეტი აცრილია და კოვიდგამოცდილებაც დიდი დაგროვდა, დროც გვქონდა, რომ უკეთ მომზადებულები შევხვედროდით მომდევნო ტალღებს, მაგრამ სიკვდილი მაინც მძვინვარებს.
ვიზიარებ ოჯახების მწუხარებას.
ძალიან მტკივნეული ამბავია,” – წერს ჩანადირი სოციალურ ქსელში.

ცნობისთვის, საქართველოში კორონავირუსის 1 915 ახალი შემთხვევა გამოვლინდა.

ქვეყანაში ბოლო 24 საათში 5 929 ადამიანი გამოჯანმრთელდა.

ბოლო დღე-ღამეში კორონავირუსით გარდაიცვალა 78 პაციენტი. ბოლო 24 საათში ქვეყანაში ჩატარდა 21 411 ტესტი, მათ შორის ანტიგენის სწრაფი ტესტით – 12 305, „პისიარ“ ტესტით – 9 106.

ქვეყანაში კორონავირუსის გამოვლენის დადებითობის მაჩვენებლებია: დღიური 8,94 %, ბოლო 14 დღის – 10,44 %, ბოლო შვიდი დღის – 10,04 %.

საქართველოში კორონავირუსით ინფიცირების სულ 545 033 შემთხვევაა გამოვლენილი, მათგან 488 661 გამოჯანმრთელდა, 7 329 კი, გარდაიცვალა.

სულ აცრილია – 1 164 402 ადამიანი, დღიურად აცრილია 17 670.

კარანტინის რეჟიმშია 103, სტაციონარში მეთვალყურეობას 7 660 ადამიანი გადის, კლინიკურ სასტუმროში იმყოფება 2 864 პირი.

ინფორმაცია მთავრობის სპეციალურ ვებგვერდ stopcov.ge-ზე ცოტა ხნის წინ განახლდა.

გუშინ, 29 აგვისტოს საქართველოში კორონავირუსის 2 669 შემთხვევა გამოვლინდა, 6 177 პაციენტი გამოჯანმრთელდა, 76 კი გარდაიცვალა.