ჯგუფ „ქუჩის ბიჭების“ წევრები, ზურა და პაატა ხაჩიძეები თბილისი „პრაიდის“ კონტრაქციას შეუერთდნენ, რომელიც პარლამენტის წინ მიმდინარეობს.
მომღერალი პაატა ხაჩიძე “ფეისბუქის” პირად გვერდზე აქციაზე გადაღებულ ფოტოებს აქვეყნებს და წერს: „ჩემი საქართველო აქ არის…“
მომღერლების გადაწყვეტილებას საზოგადოების ნაწილის მხრიდან კრიტიკული გამოხმაურებები მოჰყვა, სოციალური ქსელის მომხმარებლის, ქეთი გელაშვილის კომენტარს: “სად არის თქვენი “საქართველო”, სადაც ძალადობაა? სადაც უდანაშუალო ადამიანებზე, ქალებზე, ბავშვებზე… ძალადობენ, ფიზიკურად უსწორდებიან?” ზურა ხაჩიძე ასე პასუხობს: – “საიდან მოიტანე მერე რომ ჩვენ ძალადობას ვამართლებთ?! სად არის ჩემი საქართველო და სადაც კაცთმოყვარე მრევლია!
პაატას არსად არ უწერია, რომ ის ძალადობის მომხრეა!
რა შეგვატყვე მოძალადეების არ მესმის?”
პაატა ხაჩიძის პასუხი კი ასეთია: “შენი ხომ არის “მთავარი არხის” საქართველო და ლგბტ საზოგადოების და იყავი ბედნიერი მანდ!”
შეგახსენებთ, რომ რუსთაველის გამზირსა და მიმდებარე ტერიტორიებზე „თბილისი პრაიდის“ მოწინააღმდეგეებმა ჟურნალისტებისა და ოპერატორების მიმართ აგრესიული ქმედებები განახორციელეს, რის შედეგადაც დაშავდნენ სხვადასხვა მედიასაშუალების წარმომადგენლები.
ამასთან, აშშ-ის და ევროკავშირის საელჩოები საქართველოს ხელისუფლებას მოუწოდებენ, უზრუნველყონ ლგბტქ ადამიანების გამოხატვის თავისუფლება ისე, როგორც ამას საქართველოს კონსტიტუცია ითვალისწინებს. თუმცა, საქართველოს პრემიერ-მინისტრმა, ირაკლი ღარიბაშვილმა დღეს, დილით, მთავრობის სხდომის დაწყებამდე განაცხადა, დღეს დაგეგმილი “ღირსების მარში” მისთვის “მიზანშეუწონელი” და საფრთხის შემცველია. მისივე თქმით, ღირსების მარშის მიღმა ოპოზიცია დგას.