“სად არის პოლიცია? სად არის სანაქებო სპეცოპერაცია? სად არის შინაგან საქმეთა მინისტრი?
რატომ არ იდგა პოლიცია “პრაიდის” ოფისთან? “სირცხვილიას” ოფისთან? იქ სადაც ჟურნალისტების კონცენტრაცია იყო? რატომ აცემინეთ და დაარბევინეთ ხალხი?” – ასე ეხმაურება ჟურნალისტი დიანა ტრაპაიძე “ფეისბუქის” პირად გვერდზე მედიის წარმომადგენელბზე თავდასხმის ფაქტს.
“ბატონო პრემიერო და პატივცემულო პატრიარქო აიღეთ ამაზე პასუხისმგებლობა” – დაწერა ტრაპაიძემ. ამასთან, ტელეწამყვანმა პრემიერის დღევანდელ განცხადებას “წახალისებული ძალადობა” უწოდა.
დიანა ტრაპაიძემ “ფეისბუქზე” შინაგან საქმეთა სამინისტროს გვერდი მონიშნა და დაწერა: “ჩვენი აპარატურის ერთი ნაწილია ეს, დანარჩენის ფოტოებსაც მოგაწვდით”
შეგახსენებთ, დღეს რუსთაველის გამზირზე ღირსების მარშის მოწინააღმდეგე ძალადობრივი ჯგუფები მედიის წარმომადგენლებს დაესხნენ თავს და ფიზიკურად გაუსწორდნენ. დაშავებულია 20-მდე ჟურნალისტი. აგრესიულმა ჯგუფებმა ასევე დაარბიეს “თბილისი პრაიდისა” და “სირცხვილიას” ოფისები. პარლამენტის წინ ჩამოხსნეს ევროკავშირის დროშა.
mix.metronome.ge გმობს მედიის წარმომადგენლებზე განხორციელებულ ძალადობას და მათ პროფესიულ საქმიანობაში ხელის შეშლას.