გუშინწინ თბილისში, კეკელიძის ქუჩაზე, ხატიაშვილების ხუთსულიანი ოჯახი გამოასახლეს.
როგორც გაირკვა, ხატიაშვილების ბინის ახალი მფლობელი დარეჯან დვალია.
გამოსახლებას საზოგადოებაში დიდი ხმაური მოჰყვა. საპროტესტო აქციაზე სამართალდამცავებმა 20-მდე ადამიანი დააკავეს.
ამან ვითარება შეცვალა.
დარეჯან დვალის ადვოკატის, გიორგი სუხიტაშვილის თქმით, „შეთანხმება შედგა – კეკელიძის პირველ ნომერში მდებარე ბინის ახალი პატრონი, დარეჯან დვალი თანახმაა, 90 000 დოლარის გადახდის შემთხვევაში, ხატიაშვილებს უძრავი ქონება დაუბრუნოს, იმ პირობით თუ – “ანგაჟირებული, აგრესიული ჯგუფები” შეწყვეტენ მის წინააღმდეგ მოქმედებას“.
„ქალბატონი დარეჯან დვალი, ახლანდელი მესაკუთრე და ყოფილი მესაკუთრე – მარინა ხატიაშვილი შეთანხმდნენ, რომ მარინა ხატიაშვილს ეძლევა 1 თვის ვადა, რომ გამოისყიდოს ეს უძრავი ქონება 90 000 აშშ დოლარად იმ პირობით, რომ ქალბატონი მარინა ხატიაშვილი და მისი მხარდამჭერები შეწყვეტენ მუქარას, ზეწოლას, ფსიქოლოგიურ შანტაჟს და ზემოქმედებას ქალბატონ დარეჯან დვალზე და, ასევე, თუ ამ ერთი თვის განმავლობაში ისინი მისცემენ დარეჯან დვალს საშუალებას, რომ თავისუფლად და დაუბრკოლებლად ისარგებლოს თავისი უძრავი ქონებით,“ – განაცხადა სუხიტაშვილმა.