გუშინ თბილისში, კეკელიძის ქუჩაზე, ხატიაშვილების ხუთსულიანი ოჯახი გამოასახლეს. აღნიშნულს დიდი ხმაური მოჰყვა. სამართალდამცავებმა 20-მდე ადამიანი დააკავეს.
„ტვ პირველის“ ცნობით, იპოთეკარი, რომლის გამოც, ხატიაშვილების ოჯახი გამოასახლეს, დარეჯან დვალია.
ამავე მედიის ინფორმაციით, ის 6 ბინის მფლობელია. ასევე მის სახელზეა რეგისტრირებული საჩხერის რაიონში 7 მიწის ნაკვეთიც.
მარინა ხატიაშვილი თავისი ოჯახის გამოსახლებას კორუფციულ გარიგებას უკავშირებს. მისი თქმით, „მევახშეს სახელმწიფო იცავს“.
AMBEBI.GE დარეჯან დვალს დაუკავშირდა.
„ცუდად ვარ, ვწერავ, აწეული მაქვს შაქარი და წნევა. ეს არ არის კარგი საქმე და მე ცუდად ვარ… რა ბრალდებებიც გაისმა, ყველაფერი ტყუილია, ვინც ჩემზე რაღაცეებს ლაპარაკობს, უთხარით, სიცრუეს თავი დაანებონ. ქონებას მითვლიან, 6 სახლიო, 7 მიწის ნაკვეთიო, და ვაიმე, დედა, რა ვქნა, 6 დედმამიშვილიც მყავს და ვერ გავწყვიტავ ვერც მათ და ვერც მათ შვილებს?! ყველას მე ვპატრონობ და ძალიან ბევრი გაჭირვებული მყავს – რძალმა შვილები მიატოვა, რომლებიც მე უნდა გავზარდო, ვუპატრონო და ამის გარდა, გაჭირებული კიდევ მილიონი მყავს. ვინ მაღალჩინოსანი მფარველობს, ვუი, ვუი, დამანებეთ თავი, არ გამაცინოთ, კანონია ჩვენი მფარველი! ცუდად ვარ და ისე ნუ იზამთ, უარესად გავხდე“, – თქვა დვალმა.
მედიასთან ასევე კომენტარი გააკეთა გამოსახლებული ოჯახის წევრმა, მარინა ხატიაშვილმა.
„დღეს კიდევ შევიკრიბებით ახლობლები და მოვილაპარაკეთ, როგორ მოვიქცეთ. არსად გაქცევას არ ვაპირებ, არც გაჩერებას, ვეცდებით, რომ ნაც-ქოცური კოალიცია დავასრულოთ. ქუჩაში კი დავრჩით, მაგრამ, ღვთის მადლით, მყავს მეგობრები და მათთან გავათენებ ღამეებს… ჩვენსა და მევახშეს შორის გუშინ ვერ შედგა შეთანხმება იმიტომ, რომ ისეთ საქმეზე მოლაპარაკება, რომელიც 5 წელი არ გამოვიდა, საათებით ადრე როგორ გამოვიდოდა? ისე, ესეც თვალში ნაცრის შეყრა იყო…
სასამართლომ ბინა აუქციონზე გაიტანა და ვისგანაც თანხა ნასესხები მაქვს, იმანვე შეისყიდა. დავრჩი ღია ცის ქვეშ. სახელმწიფო აწყობილია სამევახშეო სისტემაზე და არავინაა დაინტერესებული, რომ სამართლებრივი გადაწყვეტილება დადგეს – არც ის მევახშე დაზარალებულიყო და არც ჩვენ. ამ ქალბატონმა იმდენი ქნა, ხელში ჩაიგდო ქონება, როგორც ჩანს, მას სასამართლო სისტემაშიც და სხვაგანაც ჰყავს მფარველები. ზოგადად, სასამართლო სისტემა ემსახურება (რამდენიმე მოსამართლეა გამონაკლისი) მევახშეებს, ჩვენი მოსამართლეც ეჭვი მაქვს, გარიგებაში შევიდა დვალთან. რომ არა კორუფციული გარიგება, ეს საქმე ასე არ გადაწყდებოდა. ჩვენ უამრავი მასალა გვაქვს მოპოვებული, რომ ესენი არც გადასახადებს იხდიან და არც არაფერი. როცა ვჩიოდი, მოსამართლეებმა საქმე წარმოებაში არ მიიღეს.
დღეს აღსრულების ბიურომ ყველაფერი, მათ შორის ჩემი ბიბლიოთეკა გარეთ გამოყარა, წიგნები ტალახში ყრია და ფეხებით გადაუარეს. ამაზე ძაან არაფერზე დამწყვეტია გული. რა თქმა უნდა, ვაპირებ ბრძოლას ამ ქალბატონის წინააღმდეგ, რომელსაც ადამიანსაც ვერ დაარქმევ, არ არის ადეკვატური. დღეს ჩემთან პოლიციური გამოსახლება ჩატარდა (რაც 2015 წელს აიკრძალა), აღსრულება და პოლიცია ერთად მოქმედებდა, ახლაც იქ არიან, პოლიციამაც დაგვარბია, როცა გამოვდიოდი წამაქციეს, კეფა მაქვს დარტყმული, გონება დავკარგე. სისტემასთან ბრძოლას ვაპირებ, რა საკვირველია, სამართლებრივ ჩარჩოებში“, – თქვა მან.