საქართველოს კულტურის, სპორტისა და ახალგაზრდობის სამინისტრო სამწუხარო ინფორმაციას ავრცელებს

საქართველოს კულტურის, სპორტისა და ახალგაზრდობის სამინისტრო სამწუხარო ინფორმაციას ავრცელებს:

“სპორტის სამინისტრო მწუხარებას გამოხატავს ქართული ფეხბურთის ისტორიაში გამორჩეული არბიტრის, მევლუდ მიმინოშვილის, გარდაცვალების გამო
მევლუდ მიმინოშვილი 1942 წლის 13 თებერვალს აბაშის რაიონის სოფელ სუჯუნაში დაიბადა. საერთაშორისო კატეგორიის არბიტრმა იმსაჯა ოლიმპიადების, მსოფლიოსა და ევროპის ჩემპიონატების შესარჩევ მატჩებში, ევროთასების გათამაშების არაერთ შეხვედრაზე. მან სსრკ-ის ჩემპიონატის უმაღლეს ლიგაში იმსაჯა 99 მატჩში (1979-88), საქართველოს ჩემპიონატის უმაღლეს ლიგაში კი – ცხრა მატჩში (1990). იყო სსრკ-ის VIII სპარტაკიადის (1983) ფინალის არბიტრი. მევლუდ მიმინოშვილი ექვსჯერ დაასახელეს საბჭოთა კავშირის მსაჯთა საუკეთესო ათეულში.
მევლუდ მიმინოშვილმა იმსაჯა დამოუკიდებელი საქართველოს ჩემპიონატის პირველ მატჩში, რომელშიც ერთმანეთს თბილისის „იბერია“ და ფოთის „კოლხეთი“ შეხვდნენ.
კარიერის განმავლობაში მევლუდ მიმინოშვილს უმსაჯია მატჩებში ისეთი ლეგენდარული ფეხბურთელების მონაწილეობით, როგორიც არიან: ფრანც ბეკენბაუერი, მიშელ პლატინი, ემილიო ბუტრაგენიო, კევინ კიგანი, ჰორსტ ჰრუბეში და სხვა.
აღსანიშნავია, რომ მსაჯის კარიერის დასრულების შემდეგაც მევლუდ მიმინოშვილი ქართულ ფეხბურთს ემსახურებოდა. მან აბაშის რაიონის სოფელ სუჯუნაში საფეხბურთო სტადიონი მოაწყო, რაიონის ცენტრალური სტადიონი კი მისი სახელობისაა.
2015 წლის 22 იანვარს მევლუდ მიმინოშვილს „სპორტის რაინდის“ ტიტული მიენიჭა.
საქართველოს კულტურის, სპორტისა და ახალგაზრდობის სამინისტრო პატივს მიაგებს მევლუდ მიმინოშვილის ხსოვნას და უსამძიმრებს მის ოჯახს, კოლეგებსა და მთელ სპორტულ საზოგადოებას”