კრიმინალურმა პოლიციამ ქურდული სამყაროს წევრობის ბრალდებით თბილისში ორი პირი დააკავა. გამოძიების ინფორმაციით, ბრალდებულებმა ბიზნესმენს – კ.მ.-ს, რომელიც თეთრიწყაროს მუნიციპალიტეტში საქმიანობდა, ე.წ. „კანონიერი ქურდის“ სახელით, „ქურდული სამყაროს“ სასარგებლოდ, 10 000 აშშ დოლარის გადახდა მოსთხოვეს. მოთხოვნილი თანხის გადაუხდელობის შემთხვევაში კი დაემუქრნენ, რომ მას ძალის გამოყენებით გადაიყვანდნენ თურქეთის რესპუბლიკაში, ე.წ. „კანონიერ ქურდთან“ საქმის გარჩევის მიზნით.
სამართალდამცველებმა ორივე ბრალდებული თბილისის ერთ-ერთ ცენტრალურ უბანში მას შემდეგ დააკავეს, როდესაც მსხვერპლმა მათ მოთხოვნილი თანხის ნაწილი – 5 000 აშშ დოლარი გადასცა. პოლიციამ, დაკავებულების ავტომანქანის ჩხრეკისას, 5 000 აშშ დოლარი, ხოლო ბრალდებულების დროებითი საცხოვრებელი სახლიდან – 2 ცეცხლსასროლი პისტოლეტი, 2 მჭიდი და 13 საბრძოლო ვაზნა ნივთმტკიცებად ამოიღო.
შინაგან საქმეთა სამინისტრომ გაავრცელა ფარული ოპერატიული მასალა, რომელიც კონსპირაციულ ბინაშია გადაღებული და სადაც ასახულია, თუ როგორ აიძულებენ ბიზნესმენს ქურდულ საერთოში დიდი ოდენობით თანხის შეტანას.
საუბარია 75 წლის ბორია აფაქიაზე. მას კრიმინალურ წრეებში „აფაქელას“ სახელით იცნობენ. წარმოშობით გუდაუთელი ბორია აფაქია „კანონიერი ქურდების“ ძველ თაობას მიეკუთვნება. მან მაღალი კრიმინალური სტატუსი ჯერ კიდევ 1965 წელს, 19 წლის ასაკში მიიღო. სხვადასხვა დროს მან „კანონიერ ქურდებად“ აკურთხა გავლენიანი აფხაზი კრიმინალები, მათ შორის ასტამურ შამბა და ალხაზ ავიძბა, რომლებიც გასულ წელს სოხუმში კლანებს შორის დაპირისპირების დროს რესტორანთან ჩაცხრილეს.
„აფაქელა“ ამჟამად თურქეთში ცოხვრობს, ისევე როგორც, სხვა არაერთი ქართველი „კანონიერი ქურდი“. აღსანიშნავია, რომ მას ჯანმრთელობის მძიმე პრობლემები აქვს. გაიკეთა ხორხის კიბოს ოპერაცია, რის გამოც, გამართულად საუბარს ვერ ახერხებს.
1 სულ ნახვები
კომენტარები
0 კომენტარები
