თბილისის მერიის განცხადებით, პროექტი „თბილისის ცის ქვეშ“, რომელიც პანდემიის გამო შეჩერებული იყო, აღდგომის დღესასწაულის შემდეგ განახლდება. კახა კალაძის თქმით, თბილისში შეირჩევა კონკრეტული ადგილები, სადაც ყოველ შაბათ-კვირას ქართული ესტრადის ვარსკვლავების კონცერტები გაიმართება.
დედაქალაქის მერის აღნიშნულ განცხადებას ჟურნალისტი ვახო სანაია სოციალურ ქსელში ეხმაურება და დაგეგმილ კონცერტებს ამორალურს უწოდებს.
“აღდგომა ჩაივლის და დავიწყებთო.
ჯერ ერთი, რა ამორალურობაა ახლა კონცერტები.
მეორეც, თავისი ჯიბის ფული დახარჯოს თავისი პარტიული მომღერლების სარჩენად. ჩვენ რატომ გვახდევინებს ?”, – წერს სანაია “ფეისბუქი” – ს პირად გვერდზე.
კახა კალაძემ პროექტის განხორციელება მერის მოადგილეს, ანდრია ბასილაიას დაავალა, რომლის განცხადებით, უახლოეს მომავალში ცნობილი გახდება კონცერტების ჩატარების თარიღები და ადგილმდებარეობა.
„ეს ღონისძიებები შეიძლება იყოს თბილისის სხვადასხვა რაიონში და სხვადასხვა სივრცეში, იმისთვის, რომ რაც შეიძლება მეტი ადამიანი ჩაერთოს და მასშტაბური იყოს. გარდა ამისა, დავეხმარებით ამ სფეროს წარმომადგენლებს, რომლებიც პანდემიამ სერიოზულად დააზარალა. ხალხიც, რა თქმა უნდა, მონატრებულია ასეთ ღონისძიებებს, რადგან ბოლო ორი წლის განმავლობაში ბევრი შეზღუდვა არსებობდა. შესაბამისად, დღეს უკვე ამ პროექტის განხორციელება ძალიან მნიშვნელოვანია“, – განაცხადა დედაქალაქის მერმა.
პროექტი „თბილისის ცის ქვეშ“ დედაქალაქის მერიამ 2018 წელს დაიწყო და ის ღია სივრცეებსა და პარკებში მასობრივი კულტურული ღონისძიებების გამართვას ითვალისწინებს.
3,840 სულ ნახვები
კომენტარები
0 კომენტარები
