პოლიტიკოსის თამაზ მეჭიაურის უახლოესი მეგობარი, პოეტი ტარიელ ხარხელაური სოციალურ ქსელში ემოციურ ჩანაწერს აქვეყნებს, სადაც აღნიშნავს, რომ პირველ აპრილს ზურაბ ქაფიანიძის დაბადების დღეა, მის საფლავთან დგომა კი ეულად დარჩენილს უმძიმს და ეუხერხულება. პოეტის ჩანაწერში ვკითხულობთ: – „სამეგობროში გაჩენილი სიცარიელე ზარავს, რადგან არ იცის იცინოს თუ იტიროს. საამისო ძალა ჩამოღვენთილ სანთელს დაემგვანა…
. მარტოობის განცდა მაკრთობს, მაშინებს… მეგობრული მარტოობის სიცარიელე არ მიყვარს და მითუმეტეს, მზარავს სამეგობროში გაჩენილი სიცარიელე”
„ჩემო თამაზ!
ამ სტრიქონებს სულში ჩაღვრილი ცრემლით ვწერ…
არ გაგიკვირდება, რადგან ვინ, თუ არა შენ, შეიძლება იცოდეს, რომ დიდი ხანია ასეთი ცრემლი ჩემი წუთისოფლის საგზალია… ნურავინ დააბრალებს ცრემლებს გულჩვილობას, რადგან გულჩვილობის შესაფასებლად არ გამოდგება და მითუმეტეს, არც გასამართლებლად. გულჩვილობას სხვანაირი ცრემლი აქვს, მსუბუქი და ლირიკულიც კი. მძაფრი ტკივილით მომდინარე ცრემლი მეხთა ტეხვას ჰგავს, რომელიც მარტოდ დარჩენილი კაცის გულგატეხილობაზე საუბრობს… მძიმედ, კანტი კუნტად მოსწვეთავენ ღაწვებზე და არც მარილიან კვალს ტოვებენ. არაფერზე გესაუბრებიან და სხვათა დასანახად არ ჟონავენ გულის კედლებიდან…
ჩემო თამაზ!
პირველ აპრილს ჩვენი ზურა ქაფიანიძის დაბადების დღეა, არა მხოლოდ ჩვენი დიდი მეგობრის, სრულიად საქართველოს მეგობრის. როგორ მიმძიმს და მეუხერხულება უშენოდ ზურას საფლავთან დგომა. მარტოობის განცდა მაკრთობს, მაშინებს… მეგობრული მარტოობის სიცარიელე არ მიყვარს და მითუმეტეს, მზარავს სამეგობროში გაჩენილი სიცარიელე. ახლა დიდი ილიასი არ იყოს, რა ვქნა, ვიცინო თუ ვიტირო, ვერც ერთს მოვაბამ თავს, ვერც მეორეს, რადგან საამისო ძალა ჩამოღვენთილ სანთელს დაემგვანა… და მაინც…
როგორ იმგზავრე, ლომო!..
დღენი ყვითლობენ, დამოკლდნენ,
ვერ შეძლეს არე მოჩრდილონ,
არ მოსტყდე მუხავ! არ მოსტყდე –
ქარებს არ დაემორჩილო.
თუ გაგაბეზრონ ხეთქებით.
თვალები მოგიწყლიანონ,
არ გააცინო ღმერთები –
ლოცვად არ დასდგე ტიალო…
(ძველი რვეულიდან)
ამ რწმენით
ტარიელ ხარხელაური“, – წერს ტარიელ ხარხელაური.
თიანეთის ყოფილი მერი და ყოფილი დეპუტატი, თამაზ მეჭიაური 67 წლის ასაკში გარდაიცვალა.
თამაზ მეჭიაურს კორონავირუსის გართულების შედეგად, სუნთქვის მწვავე უკმარისობა აღენიშნებოდა.
თამაზ მეჭიაური 1954 წლის პირველ დეკემბერს სოფელ ჟებოტაში დაიბადა. დაამთავრა თბილისის კომაროვის სახელობის ფიზიკა-მათემატიკური სკოლა-ინტერნატი, შემდეგ თბილისის სახელმწიფო უნივერსიტეტის საინჟინრო-ეკონომიკური ფაკულტეტი.
2012–2016 წლებში იყო საქართველოს მე-8 მოწვევის პარლამენტის წევრი, საფინანსო-საბიუჯეტო კომიტეტის თავმჯდომარე. 2016 წელს დააფუძნა პარტია „ერთიანი საქართველოსთვის“. 2017 წელს აირჩიეს თიანეთის მუნიციპალიტეტის მერად. 2020 წელს საპარლამენტო არჩევნებში მონაწილეობის მიზეზით თანამდებობიდან გადადგა.
https://mix.metronome.ge/25854-2/