პოეტ რეზო ამაშუკელის შვილი, ბაია ამაშუკელი სოციალური ქსელის მეშვეობით მიმართვას ავრცელებს:
„მითხრეს, რომ ზოგიერთებს გულზე მოფენიათ მამას გარდაცვალება. მეგონა, ადამიანობის მცირედი მაინც გააჩნდათ ნაცებს. რა უნდა ვთქვა, ამაზე მეტს უფალი ვერაფერს უზამდათ. ცხოველებზე უარესები ყოფილან! ნურც მათ ქართველობაზე დამიწყებს ვინმე საუბარს. ქართველი კაცი ასე არ იქცევა! მე კი გპირდებით, რომ მამას ესტაფეტას ვიბარებ და ბრძოლას ვაგრძელებ ბოლომდე! მამაჩემისნაირი მამა მაგათ არ ღირსებიათ და ვერც ეღირსებიან! მამას ცხოვრებით ცხოვრებას ეგენი ვერასდროს შეძლებენ, რამდენიც არ უნდა იშოვონ!“ – წერს ბაია ამაშუკელი.
10 იანვარს, 85 წლის ასაკში პოეტი რეზო ამაშუკელი გარდაიცვალა.
რეზო ამაშუკელს უკანასკნელ გზაზე, საზოგადოება, ხვალ გააცილებს.
პოეტს 15:00 საათზე სამების საკათედრო ტაძრიდან გამოასვენებენ და საბურთალოს პანთეონში დაკრძალავენ.
რეზო ამაშუკელის ლექსები და პოემები 1957 წლიდან იბეჭდება.
პოემისათვის „ძახილი“ 1968 წელს საქართველოს კომკავშირის პრემია მიენიჭა. იყო საქართველოს მწერალთა კავშირის მდივანი, ხოლო 1988-1989 წლებში შოთა რუსთაველის საზოგადოების თავმჯდომარის პირველი მოადგილე. რეზო ამაშუკელი მოქალაქეთა კავშირის თავმჯდომარის მოადგილეც იყო 1993 წელს.
ის თბილისის საპატიო მოქალაქე იყო და დაჯილდოებულია ღირსების ორდენით. გარდა ამისა, რეზო ამაშუკელი იყო გალაკტიონ ტაბიძის სახელობის პრემიისა და საქართველოს კომკავშირის პრემიის ლაურეატი.
https://mix.metronome.ge/25190-2/