საქართველოს პარლამენტის ყოფილი წევრი, მაია ნადირაძე გუშინ, 27 ოქტომბერს, თბილისში “ქართული ოცნების” მიერ გამართულ აქციას “ფეისბუქის” პირად გვერდზე შემდეგნაირად ეხმაურება:
“დღევანდელი დღის კარგი ამბავი ისაა, რომ დღეს უსახურთა ურდო კი შემოესია თბილისს, მაგრამ ეს გაუგებარი კაცთმოძულე მასა, ჩვენ დროშას ხელუხლებელს ტოვებს. საქართველოს დროშას ხელს არ კიდებენ. სადღაც გულის სიღრმეში იციან, რომ არც დროშაა მათი და არც ეს ქვეყანა.
ან, არ კიდებენ ხელს, იმიტომ რომ ეშინიათ, ემანდ, ხუთჯვრიანი დროშა ის “ იავნანა” არ აღმოჩნდეს, მანქურთებს მეხსიერებას რომ გაუღვიძებს და გაახსენებს, რომ ადამიანები და თან ქართველები არიან.
მე მაინც მადლიერი ვარ, რომ დროშას არ გვიბილწავენ. დროშა ჩვენია!”, – წერს ნადირაძე სოციალურ ქსელში.
ცნობისთვის, გუშინ, 27 ოქტომბერს, თბილისში, თავისუფლების მოედანზე “ქართული ოცნების” მიერ დაანონსებული აქცია გაიმართა, რომელიც 17:00 საათზე დაიწყო და დაახლოებით ერთი საათის განმავლობაში გაგრძელდა. აქციას მოქალაქეები სხვადასხვა რეგიონიდან შეუერთდნენ.
შეკრების ადგილიდან მოქალაქეებს სიტყვით მიმართეს „ქართული ოცნების“ ლიდერებმა, მათ შორის, პრემიერ-მინისტრმა ირაკლი ღარიბაშვილმა, პარტიის თავმჯდომარემ ირაკლი კობახიძემ, საქართველოს კულტურის, სპორტისა და ახალგაზრდობის მინისტრმა თეა წულუკიანმა, თბილისის მერობის კანდიდატმა კახა კალაძემ.
მათ მოქალაქეებს 30 ოქტომბერს, თვითმმართველობის არჩევნების მეორე ტურზე მისვლისკენ მოუწოდეს.