“გამწარებული დედის საშინელმა კივილმა შეძრა სოფელი” – რას წერს გარდაცვლილი პოლიციელის ახლობელი

სოციალურ ქსელში ქარელში მომხდარი ტრაგედიის შედეგად ერთ-ერთი გარდაცვლილი პოლიციელის ახლობელი ნატალია კახიაშვილი პოსტს აქვეყნებს:

„საშინელი დილა გაუთენდა დღეს ჩემს მშობლიურ სოფელს, გამწარებული დედის საშინელმა კივილმა შეძრა სოფელი, დილა უთენია, პირი გააღო საშინელმა ბნელმა სიკვდილმა და ორი ახალგაზრდა შეიწირა, ორივე კარგი ბიჭი.

ჩვენი ვანო, კეთილგულა ბიჭი იყო, მამაჩემის ნათლული, უბოროტო და ალალი, დიდი სხეულით დაქონდა ესოდენ დიდი გული. მშვიდი, უწყინარი და კარგი მეგობარი იყო, ერთად დავდიოდით მათემატიკის წრეზე და მისი ფარული იუმორი ხასიათს მიკეთებდა ყოველთვის. ალალი ბიჭი იყო ვანო. გაიზარდა, უმაღლესი დაამთავრა და საპატრულოში დაიწყო მუშაობა, ბოლო პატრულირება მისთვის მძიმე და საბედისწერო აღმოჩნდა, იმიტომ რომ კიდევ ერთმა მთვრალმა მძღოლმა იმსხვერპლა ჩვენი ვანო და მისი მეწყვილე. კიდევ ერთმა არადამიანმა, ჩემს მეზობელ სოფელსაც შავი მეხი დაატეხა თავს, იქაც მიასვენეს ვანოს მეწყვილე, იქაც დედის კივილმა შეძრა სოფელი, ვტირით და ვგლოვობთ ჩვენს ბიჭებს, ვიღაც კი ამ დროს ისევ უჯდება ნასვამი საჭეს და ისევ მორიგ მსხვერპლს აქცევს გვამად,…..უბედური დღე გათენდა ჩემს სოფელში, ჩემი პატარა სკოლის ზარი დღეს არ დაირეკება, ყველა ვგლოვობთ ვანოს, ჩვენს კეთილგულა ბიჭს….” – წერს ახლობელი

შეგახსენებთ, რომ ქარელში გაჩერებულ საპატრულო ეკიპაჟს ნასვამ მდგომარეობაში მყოფი პირი შეეჯახა, შეჯახების შედეგად საპატრულო პოლიციის თანამშრომლები, 50 წლის ომარ ქარელი და 31 წლის ვანო ბასანიძე სამსახურებრივი მოვალეობის შესრულების დროს დაიღუპნენ.