ქალაქ ხაშურში ბიბლიოთეკის შენობის კედელი ჩამოინგრა. ნგრევისას არავინ დაშავებულა.
შენობის წინა მხარე გარემონტებულია, თუმცა უკანა მხარე საკმაოდ სავალალო მდგომარეობაშია.
როგორც ხაშურის საკრებულოს წევრმა, მაკა დიდებულიძემ გვითხრა, შენობა 1900-იან წლებშია აშენებული.
,,კედელი, რომელიც ჩამოინგრა, შენობის უკანა მხარესაა, ეს ოთახი არ იყო განკუთვნილი მკითხველისთვის ან თანამშრომლებისთვის. ძირითადად, წიგნადი ფონდის საცავს წარმოადგენს. მე 8 წელი ვიმუშავე ბიბლიოთეკაში. გარდა იმისა, რომ შენობა ძველია, მდებარეობს რკინიგზის სიახლოვეს და ეს ფაქტორიც მოქმედებდა შენობის მდგრადობაზე. 3 წლის წინ, პროექტიც შეადგინეს მერიაში, ახალი შენობის ასაშენებლად, მაგრამ ამ პროექტის განხორციელებას პანდემიამ შეუშალა ხელი” – ამბობს საკრებულოს წევრი.
კედლის ჩამონგრევის შემდეგ, საჭირო გახდება წიგნადი ფონდის სხვა ოთახებში გადატანა. თუ წიგნებისთვის შენობის რომელიმე სივრცეში ადგილი არ მოიძებნება, სავარაუდოდ, მეზობლად მდებარე საცხოვრებელ სახლში, დროებით დააწყობენ.
ფოტო: ხაშური ჩემი ქალაქია