მარტვილის მუნიციპალიტეტის სოფელ ნოღის საჯარო სკოლის დირექტორი – რევაზ აფხაზავა 2 დღის წინ ახლობლებმა სახლში ჩამომხრჩვალი იპოვეს. ინფორმაციას მარტვილის საგანმანათლებლო რესურსცენტრში ადასტურებენ.
როგორც „პრაიმტაიმმა“ გაარკვია, 71 წლის კაცი, სოფელში მარტო ცხოვრობდა, სკოლაში კი, 15 წელზე მეტი მუშაობდა. ჩვენი ინფორმაციით, სკოლის დირექტორს მხოლოდ ერთი ძმა ჰყავდა, რომელიც ბევრი წელია, რაც თბილისში ცხოვრობს.
„ყოველთვის ცდილობდა ჩართული ყოფილიყო სოფლის საქმეებში, თუმცა ბოლო დროს, რევაზს ახლობლები აქტიურობას ვეღარ ამჩნევდნენ. გულჩათხრობილი გახდა“, – ამბობს „პრაიმტაიმთან“ საუბარისას, სოფლის რწმუნებული ბადრი ოდიშარია.
მისი თქმით, გარდაცვალების მიზეზი, შესაძლოა დეპრესიისგან იყოს გამოწვეული.
მეზობლების გადმოცემით, რევაზ აფხაზავას არც სკოლაში და არც სამეზობლოში პრობლემები არ ჰქონია.
შეგახსენებთ, რომ თვითმკვლელობის ზუსტი მიზეზი, ჯერჯერობით, კვლავ უცნობია. შინაგან საქმეთა სამინისტროში „პრაიმტაიმს“ განუცხადეს, რომ მომხდარ ფაქტზე აღძრულია სისხლის სამართლის საქმე და გამოძიება 115-ე მუხლით მიმდინარეობს, რაც თვითმკვლელობამდე მიყვანას გულისხმობს.
წყარო: “პრაიმტაიმი.”