ძალოვანი უწყების ყოფილი მაღალჩინოსანი, რომელიც ედუარდ შევარდნაძის და მიხეილ სააკაშვილის მმართველობის დროს არაერთ საქმეში იყო ჩართული „კვირის პალიტრას“ ვრცელ ინტერვიუს აძლევს, თუმცა, როგორც გამოცემა რესპონდენტის თხოვნით, მის ვინაობას არ ასაჯაროებს.
ყოფილი ძალოვანი სხვა თემებთან ერთად წინა წლებში ბინის ქურდობების გახშირებულ ფაქტებს იხსენებს და იმ დროს პოლიციისთვის საკმაოდ კარგად ცნობილი დამნაშავის შესახებ ყვება.
„ბინის ქურდობებზე კონკრეტული ჯგუფი მუშაობდა. ერთი ბინის ქურდი, რომელსაც „შკოლას“ ეძახდნენ, ნებისმიერ კარს აღებდა და ნებისმიერ ბინაში შედიოდა. სხვებისგან განსხვავებით, ძირითადად მარტო მოქმედებდა. გაჰყვებოდა ადამიანს დილით უკან, ნახავდა, სად შევიდოდა და სანამ უკან მობრუნდებოდა, მისი ბინა გაქურდული ჰქონდა.
ყველაზე რთულ კარსაც აღებდა. თუ პოლიციაში კარი ჩაგვეკეტებოდა, ჩვენც მოგვყავდა. საქართველოდან რუსეთში რომ მიდიოდა, უთქვამს, მივდივარ სხვების დასაქცევად და ჩემს გასახარადო. როგორც ვიცი, იქ დაიჭირეს. შეიძლება დღეს ცოცხალიც აღარ არის. იმ წლებში მისი სახელი ყველამ იცოდა“, – ყვება რესპონდენტი.