ღამის საათებში გადაადგილების შეზღუდვის დარღვევისთვის ფიზიკური პირები 2000 ლარით, იურიდიული პირები კი 10 000 ლარით დაჯარიმდებიან, – ამის შესახებ მთავრობის ადმინისტრაციაში, უწყებათაშორისი საკოორდინაციო საბჭოს წევრების ბრიფინგზე ვიცე-პრემიერმა, რეგიონული განვითარებისა და ინფრასტრუქტურის მინისტრმა, მაია ცქიტიშვილმა განაცხადა.
„ღამის საათებში გადაადგილების შეზღუდვებთან დაკავშირებით სანქციები უკვე განსაზღვრულია კანონით, რომელიც საკარანტინო ღონისძიებებს არეგულირებს. ამ შეზღუდვის დარღვევისთვის იმოქმედებს უკვე დაწესებული სანქცია – 2000 ლარი ფიზიკურ პირებზე, 10 000 ლარი – იურიდიულ პირებზე“, – განაცხადა ცქიტიშვილმა.
უწყებათაშორისი საკოორდინაციო საბჭოს გადაწყვეტილებით, საქართველოში არსებული ეპიდვითარების გაუარესების გამო 9 ნოემბრიდან ქვეყნის დიდ ქალაქებში ღამის საათებში, 22:00 საათიდან 05:00 საათამდე გადაადგილება შეიზღუდება.