17 მარტიდან 12 აპრილამდე წლის ყველაზე სასიამოვნო ასტროლოგიური მოვლენა მოხდება – პლანეტა ვენერა კუროს ნიშანში გადავა, სადაც ახლა რაჰუსა და ურანის კარმული კვანძია. ვენერა კუროს ნიშნის მმართველია და როცა პლანეტა თავის ნიშანში მოძრაობს, თავს ჰარმონიულად გრძნობს და მზადაა, სამყარო გულუხვად დაასაჩუქროს.
ეს კომბინაცია სილამაზეზე, ნაყოფიერებასა და ფინანსურ კეთილდღეობაზეა პასუხისმგებელი და ადამიანებს, განსაკუთრებით კი ქალებს, საოცარ მოტივაციასა და გარდასახვის უნარს აძლევს. ასტროლოგიაში ითვლება, რომ პლანეტა ვენერა ქალის სიმბოლოა, კურო კი სილამაზესა და ესთეტიკას აფასებს. ამიტომაც, აღნიშნული ასტროლოგიური მოვლენა ქალებისთვის განსაკუთრებით მნიშვნელოვანია.
ამ პერიოდის განმავლობაში ბევრი ქალი დაწინაურდება და საკუთარ შესაძლებლობებს ყველაზე უკეთ წარმოაჩენს. გექნებათ უამრავი საინტერესო და შთამაგონებელი იდეა, რომელთა განხორციელებასაც ეტაპობრივად გადაწყვეტთ. ახლა ძალიან დიდ მოტივაციას იგრძნობთ და გაგიჩნდებათ სურვილი, საკუთარი ცხოვრება უკეთესობისკენ გარდაქმნათ და სცადოთ ის, რისი გაკეთებაც სულ გინდოდათ, მაგრამ გამბედაობა არ გყოფნიდათ.
ამ პერიოდში უფრო მეტად მოგინდებათ, რომ მეგობრებთან, დასთან, დედასთან, თქვენთვის მნიშვნელოვან ქალთან ერთად ისაუბროთ და საკუთარი გრძნობები და ემოციები გააზიაროთ. ეს თერაპიული საუბრები ფინჯან ყავასთან თუ ჩაისთან თქვენთვის მნიშვნელოვანი განტვირთვა იქნება და საოცარ სიმსუბუქეს იგრძნობთ.
თქვენი თვითშეფასებისა და აღიარების თვალსაზრისით, 21- 22 ან 30-31 მარტი განსაკუთრებით მნიშვნელოვანი დღეები იქნება, როდესაც თქვენ, როგორც ქალი, დიდ მოტივაციას იგრძნობთ და ასევე, შესაძლოა, გამოჩნდეს ისეთი ადამიანი, რომელიც წარმოუდგენლად კარგ დახმარებას გაგიწევთ, მოგცემთ რჩევასა და სწორ მიმართულებას.
ამიტომაც, აღნიშნულ თარიღებში აუცილებლად დაგეგმეთ მეგობრებთან შეხვედრა ან ვიზაჟისტთან, კოსმეტოლოგთან, ფსიქოლოგთან კონსულტაციები, მოინიშნეთ ყველა ის იდეა, რომელიც გაგიჩნდებათ, არ შეიზღუდოთ თავი, სცადოთ ახალი რაღაცები, წამოიწყეთ განსხვავებული საქმეები და შესანიშნავ შედეგს ნახავთ.
წყარო – “ბომონდი”
