საქართველოში კორონავირუსით გამოწვეული გართულებების შედეგად 30-წლამდე ასაკის პაციენტი გარდაიცვალა. ამის შესახებ დაავადებათა კონტროლის ეროვნული ცენტრის ხელმძღვანელმა, ამირან გამყრელიძემ ბრიფინგზე განაცხადა.
“სამწუხაროდ, დილის მონაცემებით გარდაცვლილია 14 პაციენტი, სხვადასხვა კლინიკაში. გარდაცვლილები გვყავს ბათუმში, თბილისსა და ქუთაისში. რაც შეეხება ასაკს, უმეტეს შემთხვევაში არის ხანდაზმული ასაკი, მაგრამ სამწუხაროდ, გვყავს ერთი გარდაცვლილი ახალგაზრდა, ასაკი არის 30 წლამდე. სიკვდილის მიზეზს კლინიცისტები ადგენენ. ჩვენ ინფორმაციას ვიძლევით მხოლოდ სასტისტიკის კუთხით. აღნიშნული პაციენტი, ისევე, როგორც ყველა სხვა გარდაცვლილი პაციენტი, იმყოფებოდა კლინიკაში” – განაცხადა გამყრელიძემ.
ცნობისათვის, გასული დღე-ღამის განმავლობაში საქართველოში კორონავირუსით 14 პაციენტი გარდაიცვალა. ქვეყნის მასშტაბით ჯამში ვირუსით 172 ადამიანია დაღუპული. ამასთან, ქვეყანაში კორონავირუსის 1351 ახალი შემთხვევა დაფიქსირდა. ქვეყნის მასშტაბით ინფიცირებულია 21 208-ს ადამიანი. აქედან გამოჯანმრთელებულია 9003 ადამიანი.