ბავშვთა ენდოკრინოლოგის, იაშვილის სახელობის ბავშვთა ცენტრალური საავადმყოფოს ენდოკრინოლოგიური სამსახურის ხელმძღვანელის ნინო ხელაძის განცხადებით, ბავშვებში ჭარბი წონა და სიმსუქნე მომატებულ რისკებთანაც ასოცირდება. ამის შესახებ მან „მედიაცენტრ მთავარში” განაცხადა.
“ითვლებოდა, რომ სიმსუქნე არის ყველაზე რთული ქრონიკული და ყველაზე გავრცელებული პედიატრიული პათოლოგია, ახლა, კოვიდის დროს, ეს მდგომარეობა გაუარესდა და პლუს ამას ეს პრობლემა ასოცირებულია კოვიდის მომატებულ რისკებთან” – თქვა მან.
მას კითხვით მიმართეს, თუ რა ჩივილებით მიმართავენ მშობლები ენდოკრინოლოგებს და პანდემიის შედეგად ბავშვებში რა პრობლემებმა იჩინა თავი. ხელაძემ ერთ-ერთ მთავარ პრობლემად ბავშვებში ჭარბი წონა და სიმსუქნე გამოყო. მისივე თქმით, კოვიდის დროს ბავშვებში სიმსუქნე ასევე ერთ-ერთ რისკ-ფაქტორს წარმოადგენს და ამასთან დაკავშირებით კვლევები კანადამ ჩაატარა. აღნიშნული კვლევებით იქ რისკ-ფაქტორებში პირველი ადგილი სიმსივნეს უკავია და შემდეგ მოდის იმუნოსუპრესია და შემდეგ სიმსუქნე.
„კვლევა ნიუ-იორკშიც ჩატარდა, სადაც თითქმის პირველ ადგილზე იყო რისკ-ფაქტორებს შორის სიმსუქნე. იმ ბავშვებს შორის, რომელთაც რენიმაციაში მოთავსება და ხელოვნური ვენტილაცია დასჭირდათ, აღმოჩნდა, რომ ყველა მსუქანი იყო. ითვლებოდა, რომ სიმსუქნე არის ყველაზე რთული ქრონიკული და ყველაზე გავრცელებული პედიატრიული პათოლოგია, ახლა კოვიდის დროს ეს გაუარესდა და პლუს ამას ასოცირებულია კოვიდის მომატებულ რისკებთან” – განაცხადა ბავშვთა ენდოკრინოლოგმა.