შატილის გზაზე მომხდარი ავტოსაგზაო შემთხვევის შედეგად დაღუპული 26 წლის ნიკოლოზ ყაჭიურის დედა იხსენებს, რომ ნიკოლოზს შატილში წასვლა ძალიან უნდოდა. მისივე თქმით, ტრაგედიის შესახებ როცა გაიგო, ბოლომდე არ დაიჯერა, რომ შესაძლოა, სწორედ იმ საბედისწერო ტრანსპორტში ყოფილიყო მისი შვილი.
,,უნდა წავიდე აუცილებლად შატილში, იქნებ ჩემი გვარის წარმომავლობა გავიგო, ვინმე, წინაპარი ვნახოო. ღამე შემოვიდა ჩემ ოთახში და მითხრა: დე, გეხვეწები, დილით 4-ის ნახევარზე გამაღვიძე, არ დაგავიწყდეს, არ დავრჩე წაუსვლელიო, რამდენჯერმე მითხრა.
იძახდნენ, რამდენიმე მარშუტკაა წასულიო – ვფიქრობდი, არ არსებობს, იმ მარშუტკაში არ იქნება-თქო. იმდენად ქოთქოთა იყო, სიცოცხლის სავსე, არ არსებობს იმ მარშუტკაში იყოს მეთქი. მეუღლე რომ შეიყვანეს ამოსაცნობად, ცოტა შიში კი შემეპარა, მაგრამ მაინც ბოლო წუთამდე არ ვიჯერებდი, გამოვიდა და მითხრა: ჩვენ ნიკოლოზს ტკბილად სძინავსო”, – იხსენებს დაღუპული ბიჭის დედა მზია ყაჭიური “ნანუკას შოუში”.
ცნობისთვის, 23 აგვისტოს, შატილის გზაზე, სოფელ ბისოს სიახლოვეს, ერთ-ერთი ტურისტული კომპანიის მიკროავტობუსი 80 მეტრის სიმაღლიდან კლდოვან ფერდობზე გადავარდა. ავტოსაგზაო შემთხვევას 17 ადამიანი ემსხვერპლა. სამი ადამიანი მძიმედ დაშავდა.