“კურიერი” საგარეჯოს ტრაგედიისა და თავდამსხმელის შესახებ მეტი დეტალის გარკვევას ცდილობს. გადამღები ჯგუფი იმ საცხოვრებელ კორპუსთან იმყოფებოდა, სადაც ნოდარ ათუაშვილის ყოფილი მეუღლე და შვილი ცხოვრობენ. როგორც მათი მეზობლები ყვებიან, მამაკაცი იყო მოძალადე და ის ფიზიკურად ხშირად უსწორდებოდა როგორც მეუღლეს, ასევე შვილს. ახალ წლამდე ცოტა ხნით ადრე კი მათ სახლის დატოვებაც მოსთხოვა.
ირკვევა, რომ ქალს შვილთან ერთად ყოფილმა მეუღლემ სახლის დატოვება აიძულა. მეზობლების განმარტებით, ნოდარ ათუაშვილის მხრიდან ქალი მუდმივად ძალადობის მსხვერპლი იყო. მასზე ძალადობდა როგორც ფსიქოლოგიურად, ასევე ფიზიკურად და ამის შესახებ მეზობლებმა იცოდნენ. მეტიც, ნოდარ ათუაშვილთან დაკავშირებით საუბრისას მეზობლებმა აღნიშნეს, რომ კაცი თავის შვილზეც ძალადობდა. ეს სწორედ ის შვილია, რომელიც გუშინ შემთხვევის დროს მის საცხოვრებელ სახლში იმყოფებოდა.
“რაც იცხოვრეს ერთად, სულ ცემა-ბეგვაში… ერთხელ უდაბნოს გზაზეც მიატოვა თურმე ნაცემი გოგო. მერე შემთხვევით რაღაც მანქანა გამოვიდა.. ეგ ომებში ნამყოფი ბიჭი რომ იყო, ეტყობა ვერ იყო კარგად. ხან ცოლს სცემდა, ხან გააგდებდა, ხან შეირიგებდა. მოუვლიდა რაღაცა და ხან ეჭვიანობდა და ხან რა. 2 კვირის წინ მოსულა და ეს გოგო გაუგდია ამ სახლიდან, ცოლი. წადი აქედანო, ჩემი ბინააო და წადიო,” – აცხადებენ მეზობლები სოფელ მანავიდან.
შეგახსენებთ, საგარეჯოში, ერთ-ერთი კორპუსიდან შეიარაღებულმა პირმა ცეცხლი გვიან ღამით გახსნა.
სროლის შედეგად, თავდამსხმელის ჩათვლით, რომელმაც საბოლოოდ თავი მოიკლა, დაიღუპა 6 ადამიანი, დაჭრილია 5 პირი.
შსს-ს ცნობით, შემთხვევის ადგილზე სპეცდანიშნულების რაზმის მისვლისთანავე ბრალდებულმა ცეცხლსასროლი იარაღიდან გასროლით, სავარაუდოდ, თვითლიკვიდაცია განახორციელა.