აკადემიკოს ავთო სილაგაძის მიიჩნევს, რომ საპენსიო დანაზოგს საფრთხე შეიძლება სავალუტო რყევებმა და არასტაბილურმა მართვამ შეუქმნას. აკადემიკოსის რეკომენდაციაა, საპენსიო დანაზოგი ეკონომიკის გაჯანსაღებას, განსაკუთრებით მცირე და საშუალო ბიზნესის საჭიროებებს მოხმარდეს.
“თანხის შენახვას, მით უმეტეს ამხელა დევალვაციისა და ინფლაციის პირობებში, აზრი არ აქვს. მომხრე ვარ, რომ საპენსიო ფონდში შესული თანხა დაიხარჯოს. ცხადია, 79,5 მილიონ ლარამდე დანაზოგი კარგი მაჩვენებელია ამ დროისათვის და არ შეიძლება, ეს ფული უმოძრაოდ იყოს. მისი სტაბილურობა მთლიანად დამოკიდებულია ლარის კურსზე, რაც გასათვალისწინებელია. თუკი რაიმე შექმნის საფრთხეს, ეს ლარის გაუფასურება და საპენსიო ფონდის არასტაბილური მართვაა, სხვა რისკს ვერ ვხედავ. აუცილებელია, რომ ფონდში აკუმულირებული თანხა ეკონომიკაში დაბანდდეს, საჭირო თუ გახდა, მცირე და საშუალო ბიზნესს მოხმარდეს. ნებისმიერ შემთხვევაში, სხვა მიმართულებით უნდა გადამისამართდეს, ჩაიდოს ბიზნესში მრავალმხრივი ოპერაციებისთვის. საბოლოო გადაწყვეტილება მენეჯმენტმა უნდა მიიღოს, როგორც ეს დასავლეთის ქვეყნებშია” – ამბობს სილაგაძე report.ge-თან საუბრისას.