მალხაზ მაჩალიკაშვილი თამარ ბაჩალიაშვილის გარდაცვალების შესახებ ახალ ვერსიას ავრცელებს. TV პირველის ეთერში მან აღნიშნა, რომ 23 წლის ახალგაზრდა ქალი სახელმწიფო უსაფრთხოების სამსახურზე მუშაობდა. მაჩალიკაშვილის თქმით, შესაძლოა პროგრამისტი გოგონა ირანის, ყარაბახის, ან რუსეთის საქმეებზე გამოიყენეს.
„ამ ბავშვს ჰქონდა ორი სამსახური. არ მიწყინოს ოჯახმა, მაგრამ ხალხმა უნდა იცოდეს ვფიქრობ, ის მეორე სამსახური მუშაობდა სუსზე. მთელი ხელისუფლება არის დამოკიდებული სუს-ზე. ეს სუსიც ძალიან განებივრდა და თავის თავს უფლებას აძლევს ჩაერიოს ყველგან. შეიძლებოდა ნებისმიერ ბინძურ საქმეში გამოეყენებინათ გინდა ირანი იყოს ან ყარაბახი, თუნდაც რუსეთი. ეს არ არის თვითმკვლელობა, ეს მკვლელობაა და ზუსტად ვხედავ, რომ ამ საქმეში მაღალჩინოსნები არიან ჩარეულები” – განაცხადა მაჩალიკაშვილმა.
ცნობისთვის, თამარ ბაჩალიაშვილის მანქანა პირველად 31 აგვისტოს გაიხსნა. ადვოკატი და მშობლები, ეჭვობდნენ, რომ ბაჩალიაშვილი ჯერ მოკლეს, ავტომობილი კი მოგვიანებით ბუქსირით მიიტანეს იმ ადგილას, სადაც ცხედარი იპოვეს.
თამარ ბაჩალიაშვილის დედა, თეონა თამაზაშვილი განმარტავს, რომ თამარმა “შემთხვევით გახსნა და გაშიფრა ის სქემა, თუ როგორ მარაგდებოდა ყარაბაღის ომი იარაღით”. თეონა თამაზაშვილის თქმით, მას ამის შესახებ ინფორმაცია წყარომ მიაწოდა და იგი აზერბაიჯანის და თურქეთის მთავრობებს მოუწოდებს, დაინტერესდნენ ამ საკითხით.
შეგახსენებთ, თამარ ბაჩალიაშვილი 18 ივლისს გაუჩინარდა. ახალგაზრდა პროგრამისტი შაბათს სახლიდან გავიდა, ის სათვალთვალო კამერებმა ბოლოს თეთრიწყაროს რაიონში დააფიქსირეს. მოგვიანებით 23 წლის თამარ ბაჩალიაშვილი თეთრიწყაროს ტყეში, საკუთარ მანქანაში გარდაცვლილი იპოვეს.