სასტუმრო “ლუქსში” მომხდარი აფეთქებისას დაშავებული პირი 47 წლის ბიზნესმენი გიორგი მაისურაძეა – ,,ტვ პირველმა” თბილისში მომხდარი შემთხვევის დეტალები გაარკვია.
ბიზნესმენის მდგომარეობა ამ დრომდე კრიტიკულია. შესაძლოა, მას კიდურების ამპუტაცია დასჭირდეს. ახლა ღუდუშაურის კლინიკის ექიმები მისი გადარჩენისთვის იბრძვიან. მაისურაძეს მრავლობითი ჭრილობები თავში, გულმკერდსა და ქვედა კიდურებზე აქვს მიყენებული.
სასტუმრო ამ დროისთვის დალუქულია და პერსონალის გამოკითხვა მიმდინარეობს. გაზით სარგებლობის წესების დარღვევა თავიდანვე გამოირიცხა, რადგან ადგილზე მისულმა ,,თბილისი ენერჯის ჯგუფის” წარმომადგენლებმა განაცხადეს, რომ აირის გაჟონვა არ მომხდარა.
ცნობილია, რომ გიორგი მაისურაძე დუშეთში დარეგისტრირებული რამდენიმე კომპანიის, “ტექნო ჰოლდინგის”, “დიჯი ჰოლდინგისა” და “ფრეშ ჯორჯიას” წილის 100%- ის მფლობელია.
წყარო: ტვ პირველი