სიმფეროპოლში (რუსეთის მიერ დროებით ოკუპირებული ყირიმი) დაპირისპირება მოხდა, რომელშიც რუსეთის შეიარაღებული ძალების სამხედრო მოსამსახურეც მონაწილეობდა. ჩხუბის დროს ოკუპანტ სამხედროს ესროლეს და ფეხში დაჭრეს. ინფორმაციას ინციდენტის შესახებ, რუსული ტელეგრამის არხი „ბაზა“ ავრცელებს.
არხის ცნობით, რუსეთის შეიარაღებული ძალების 23 წლის ლეიტენანტი მაქსიმი, ტამბოვის რეგიონიდან თანამებრძოლებთან ერთად კიროვის გამზირზე მდებარე რესტორან „ჯიპსტერში“ იმყოფებოდა. რის შემდეგაც მეგობრებთან ერთად ქუჩაში გავიდა და გამვლელებთან იჩხუბა.
ერთ-ერთმა მოწინააღმდეგემ სამხედრო მოსამსახურეს მაკაროვის ტიპის იარაღი წაართვა და ფეხში ესროლა. არსებული ცნობებით, პოლიციამ შემთხვევის ექვსი მონაწილე დააკავა.
ბარძაყის არეში ცეცხლსასროლი იარაღიდან დაჭრილი რუსი ოფიცერი ადგილობრივ საავადმყოფოში გადაიყვანეს.
წყარო: “მთავარი არხი”