ცოლის მიმართ ფიზიკურ და ფსიქოლოგიურ ძალადობაში ბრალდებული ჩოგბურთელის, ნიკოლოზ ბასილაშვილის ადვოკატი, თეონა გვაზავა აცხადებს, რომ ნეკა დოროყაშვილის მიერ სასამართლოსთვის მიწოდებული ინფორმაცია სიმართლეს არ შეესაბამება.
ადვოკატის მტკიცებით, ამას საქმეში არსებული მტკიცებულებები ადასტურებს.
“ნებისმიერ ობიექტურ პირს დარჩებოდა შთაბეჭდილება, რომ ნელი დოროყაშვილის მიერ სასამართლოში მიწოდებული ინფორმაცია სიმართლე არ არის. საქმეში არაერთი მტკიცებულება არის მოთავსებული, რომელიც ცალსახად ადასტურებს, რომ ნელი დოროყაშვილის მიერ სასამართლოში გაჟღერებული ინფორმაცია, როგორც წინა, ასევე დღევანდელ პროცესებზე, სიმართლეს არ შეესაბამება. ასეთ დროს, ჩვენ ვეფუძნებით არა ნელი დოროყაშვილის მეგობრების ჩვენებებს, არამედ, ისეთ უტყუარ მტკიცებულებებს, როგორიც მის მიერ განხორციელებული მიმოწერები და მის მიერ დამზადებული აუდიო, ვიდეოჩანაწერებია”, – აცხადებს ადვოკატი.
თეონა გვაზავას თქმით, დოროყაშვილმა არაერთხელ განახორციელა ბასილაშვილის მიმართ მუქარა, რის შემდეგაც, ეს უკანასკნელი ყოფილ ცოლს მარტო არასდროს ხვდებოდა.
“ბასილაშვილი ნელი დოროყაშვილს არასაიმედო პიროვნებად მიიჩნევდა, მითუმეტეს, იმ ფონზე, როცა მან არაერთხელ, მათ შორის, საჯაროდ, სხვა პირების თანდასწრებით და კომუნიკაციის მეშვეობით განახორციელა მუქარა, რის შემდეგაც, ნიკოლოზ ბასილაშვილი ნელი დოროყაშვილს არასდროს ხვდებოდა პირადად და ის შეხვედრების დროს, ყოველთვის სხვა პირებთან ერთად მიდიოდა, რადგან მსგავს საფრთხეს ის ნელი დოროყაშვილისგან ყოველთვის გრძნობდა. გარკვეული საფრთხე, რომელიც შეიძლება ნელი დოროყაშვილისგან ყოფილიყო პროვოცირებული. ერთ-ერთი სატელეფონო კომუნიკაციის შემდეგ, ღამის საათებში, ნიკოლოზ ბასილაშვილი ნელი დოროყაშვილის სახლში არ ავიდა, ვიდრე საპატრულო პოლიცია არ გამოიძახა, ვინაიდან ის გარკვეული სახის პროვოკაციას ელოდა. საპატრულო ეკიპაჟი ბინაში შევიდა, სადაც ჭურჭელი დამტვრეული იყო. ამას ადასტურებს არამხოლოდ ნიკოლოზ ბასილაშვილი, არამედ, ის მოწმე, რომელიც მას პატრულებთან ერთად თან ახლდა“, – აცხადებს ბასილაშვილის ადვოკატი.
ნიკოლოზ ბასილაშვილს ფიზიკური ძალადობის 4 და ფსიქოლოგიური ძალადობის ერთ ეპიზოდზე ედება ბრალი.
წყარო: Ambebi.ge
350 ნახვა
