29 ივლისს, გუდაურში დატრიალებულმა ტრაგედიამ მთელი საქართველო შეძრა – სასაზღვრო პოლიციის ვერტმფრენი, რომელიც სამაშველო ოპერაციაზე იმყოფებოდა, ჩამოვარდა. შემთხვევას ბორტის რვავე წევრი ემსხვერპლა, მათ შორის იყო სასწრაფო დახმარების ექიმი, ქეთევან გულაღაშვილი, რომელიც ტრაგედიის დროს დაღუპული ერთადერთი ქალია.
მისი კოლეგა, გვანცა ღვინაშვილი ქეთის შესახებ ამბობს:
“სამართლიანი გოგო იყო, მეგობრული და თბილი. უანგარო ექიმი გახლდათ. მუნიციპალურ თავშესაფარშიც მუშაობდა და გიჟდებოდა მოხუც ბენეფიციარებზე. ყველას ისტორია შესწავლილი ჰქონდა და ვისაც შვილები ყურადღებას არ აქცევენ, ქეთი შვილივით ექცეოდა. განიცდიდა მათ ამბავს, ტიროდა. არა მხოლოდ ექიმი, პირველ რიგში ადამიანი იყო. ზედმეტს არავისზე არ იტყოდა. ვინმე თუ აწყენინებდა, პირდაპირ ეტყოდა, კახურად.
იმ დღეს მხიარულები იყვნენ ქეთიც და გიორგიც. დაგვემშვიდობნენ, წავიდნენ და წავიდნენ. მერე ეს შოკის მომგვრელი ამბავი გავიგეთ. არ ვიჯერებდით. არ ვიცი, ეს მდგომარეობა როდის გაგვივლის.
ქეთი 44 წლის იყო. ოჯახი არ ჰყავდა. არ გამიგია, რომ ვინმეს ხვდებოდა. მე ვეხუმრებოდი, შენ გულის კარი გამოკეტილი არ გექნება-მეთქი. თუ უფალს უნდა რაღაც იქნებაო, ამბობდა.
მორწმუნე იყო. 12 ივლისს პეტრე-პავლობას დაბადების დღე ჰქონდა, ეზიარა. მითხრა, ბევრი მირეკავდა, მილოცავდა, მაგრამ მე არავის ნახვა არ მინდოდაო. უცებ დედა მომენატრა, დავჯექი მანქანაზე, ჩავედი კახეთში და გავახარე. კარგა ხანი ვიჯექი ეკლესიის ეზოშიო. ასე ეზიარა საკუთარ დაბადების დღეზე უკანასკნელად და 17 დღეში წავიდა…”, – ამბობს დაღუპული ექიმის კოლეგა.
წყარო: “პრაიმტაიმი”